حازم إكس: "بفرحك وأنت بتزعلني” فكرة رامي صبري.. والأغنية مختلفة
كشف الشاعر حازم إكس كواليس تعاونه الأول مع الفنان رامي صبري في أغنية “بفرحك وأنت بتزعلني”، مؤكداً أن فكرة الأغنية كانت من رامي نفسه، بينما تولى هو كتابة الكلمات على اللحن والفكرة التي طرحها.
وقال حازم إكس في تصريح خاص لـ”وشوشة”: “فكرة الكلام أصلًا كانت بتاعة رامي صبري، هو كان معاه الفكرة واللحن، واختارني أنا اللي أكتب عليها. كان عايز يقول فكرة إن مهما تعمل للشخص اللي قدامك وتفرحه، تلاقيه بيزعلك، ومن هنا بدأت أشتغل على الكلمات، والحمد لله طلعت بالشكل ده".
وتابع: “ده أول تعاون بيني وبين رامي صبري، وإن شاء الله يتكرر تاني، لأنه بصراحة شخص عسل جدًا والتعامل معاه جميل".
وعن ردود الأفعال التي تلقاها بعد طرح الأغنية، قال: “الحمد لله مبسوط جدًا بردود الأفعال، وأكتر تعليق فرحني إن ناس كتير قالت إن الأغنية مش شبه رامي صبري".
وأضاف: “يمكن البعض يشوفها ملاحظة إيجابية أو سلبية، لكن بالنسبة لي كانت حاجة مفرحة جدًا، لأن أنا بحب لما أتعاون مع فنان أضيف بصمتي الخاصة، وما أقدمش نفس اللي هو بيقدمه طول الوقت".
وأشار حازم إكس إلى أن أغنية “بفرحك وأنت بتزعلني” هي تعاونه الوحيد ضمن ألبوم رامي صبري الحالي، قائلاً: “في الألبوم ده خلاص هي أغنية واحدة بس".
ويُعد حازم إكس واحدًا من الشعراء الشباب الذين استطاعوا لفت الأنظار خلال السنوات الأخيرة، بفضل أسلوبه المختلف وقدرته على تقديم أفكار جديدة وبصمة خاصة في أعماله، ما جعله من الأسماء الموهوبة التي تحظى بإشادات واسعة داخل الوسط الغنائي، خاصة مع حرصه على التنوع وعدم تكرار نفسه في كل تعاون جديد.
