شريهان: يوم افتتاح المتحف المصري الكبير هو تتويج لرحلتي الفنية
خطفت النجمة شريهان الأنظار بظهورها المهيب بعد سنوات من الغياب، وقدّمت فقرة استعراضية وصفتها بأنها «تتويج لعمرها ومسيرتها».
"مافيش أعظم من النهارده"
قالت شريهان في مداخلة هاتفية مع الإعلامية لميس الحديدي خلال برنامج "الصورة" على قناة النهار: «الشرف كل الشرف لي، مافيش أعظم من النهارده، ده تتويج لعمري ومسيرتي. أنا فخورة وسعيدة إني كنت وسط كوكبة من المبدعين: محمد سعدي، وهشام نزيه، ومازن المتجول، والمايسترو هاني أباظة. كلهم عظماء، ومش عاوزة أنسى حد».
وأضافت:«مش قادرة ألملم مشاعري.. حاسة إن كل اللي فات من عمري كان استعداد لليوم ده».
عبرت شريهان عن حالة من الامتنان الشديد لما عاشته في الحفل، قائلة: «النهارده مش مجرد حدث فني، ده حالة روحانية.. أنا عاوزة أصلي بقية عمري شكرًا لله، على هذا التكريم وهذا الشرف العظيم على أرض بلدي».
انتماء وفخر مصري أصيل
وتابعت النجمة حديثها عن شعورها بالفخر قائلة:«المتحف المصري الكبير مش بس حدث، ده رسالة حضارية للعالم كله.. أنا مصرية، وأنتمي لأقدم شعب في التاريخ، أول حضارة، وأول جيش نظامي، وأول دولة بتاريخ مكتوب. الكلمات دي خرجت من قلبي قبل لساني».
كواليس فستان "إيلي صعب": من فكرة إلى تحفة فرعونية
وعن إطلالتها التي لاقت إعجاب الجمهور، كشفت شريهان عن كواليس اختيارها للمصمم العالمي إيلي صعب، موضحة: «لما اتعرض عليا أشارك في الاحتفال، أول حاجة فكرت فيها: مين يليق بمصر؟ مين ممكن ألبس من عنده وأكون فخورة وأنا واقفة وسط حضارة آلاف السنين؟ ما لقيتش غير إيلي صعب».
وتابعت: «روحت قولتله: إحنا بنحفر على حجر جنب الأهرامات، لازم التصميم يليق بالحضارة المصرية. رغم ضيق الوقت، القماشة اتطرزت في إيطاليا بتفاصيل فرعونية دقيقة، وكان هدفي إن الحجر المصري نفسه هو اللامع».
"الأمانة أكبر مني.. لكني فخورة"
واختتمت شريهان حديثها قائلة: «قلت لإيلي صعب: الأمانة اللي شايلها كبيرة، أنا مين أكون جنب الحضارة المصرية؟ لكنه شجعني وقال لي إنك جزء منها. النهارده حسيت إني فعلاً جزء صغير من هذا المجد العظيم.. وأنا فخورة جدًا».