محمد أنور لـ"وشوشة": رامز جلال بيهتم بكل التفاصيل.. وسعيد بالتعاون معه
يستكمل الفنان محمد أنور حالياً تصوير مشاهده ضمن أحداث فيلم "بيج رامي"، الذي يقوم ببطولته الفنان رامز جلال، ويجمع الفيلم نخبة من صناع السينما، حيث كتب السيناريو فاروق هاشم ومصطفى عمر، ويتولى إخراجه محمود كريم.
وفي تصريح خاص لـ"وشوشة"، أعرب محمد أنور عن سعادته بالمشاركة في هذا العمل، قائلاً: "أنا بحب رامز جداً، حتى على المستوى الشخصي، واشتغلت قبل كده مع المخرج محمود كريم في فيلم "جوازة توكسيك"، والحمد لله حققنا رد فعل حلو، والمرة دي كمان تركيبة الفيلم كلها مكتوبة بشكل رائع، الورق فعلاً عاجبني ودوري كمان حبيته جداً".
وكشف أنور عن طبيعة دوره في الفيلم، قائلاً: "أجسد شخصية مدرب رياضي في نادي، حيث يتعرض رامز جلال لواقعة غريبة في أول خمس دقائق من الفيلم، ومن بعدها تبدأ رحلتنا معاً لحل المشكلة، وده بيخليني أكون معاه طول الأحداث لحد النهاية".
ورغم أنه لم يبدأ تصوير مشاهده المباشرة مع رامز جلال حتى الآن، إلا أنه أبدى إعجابه الشديد بأداء رامز في العمل، موضحاً: "أنا فعلاً منبهر بشغله، مكنتش متخيل إنه دقيق بالشكل ده، هو بيقف على كل شوت وكل كلمة، وبيطلب دايماً تحسين الأداء، وبيهتم بكل حد في الفيلم علشان يطلع بأفضل صورة".
وأضاف: "رامز مركز جداً في الفيلم ده، وقاعد على الورق بقاله شهور، وبيشتغل عليه بقالهم أكتر من سنتين علشان يطلع بحاجة قوية يرجع بيه للجمهور بشكل مختلف وأنا بجد مبسوط بالشغل معاه جداً".
أما عن المواقف الطريفة التي يشتهر بها رامز جلال في الكواليس، قال أنور ممازحاً: "لسه ماجربتش الحاجات اللي بيعملها رامز ورا الكاميرا وربنا يستر".
ويذكر أن أحدث أعمال محمد أنور في السينما كان فيلم "جوازة توكسيك"، والذي جمعه بنخبة من النجوم، من بينهم ليلى علوي، بيومي فؤاد، هيدي كرم، ملك قورة، وتامر هجرس، وهو من تأليف لؤي السيد وإخراج محمود كريم، وقدم الفيلم توليفة درامية كوميدية نالت إعجاب الجمهور بمختلف فئاته العمرية.