خالد النبوي يقتحم عالم الإخراج بفيلم عن بورسعيد.. قريبًا
شهد اليوم الأول من فعاليات الدورة الرابعة عشر لمهرجان الأقصر للسينما الأفريقية، تنظيم ندوة تكريمية للفنان خالد النبوي، والتي أقيمت داخل معبد الأقصر.
وخلال كلمته في الندوة، استعاد خالد النبوي ذكريات بداياته في عالم التمثيل، قائلاً: "مكنش في دماغي أمثل، دخلت المعهد العالي للتعاون الزراعي ومكنش عندي شغف للمواد دي".
وأضاف: “مرة لقيت غرفة مكتوب عليها المسرح، دخلت ولقيت مخرج وناس بيعملوا مسرحية المخرج قالي اقرأ الدور ده، قولتله أنا بس هتفرج، قالي لو هتتفرج بس اطلع بره فأخذت الورق وبدأت أقرأ”.
وتابع: "اكتشفت بعدها أن الدور اللي قالي أعمله هو دور بطل المسرحية بصراحة اعتذرت، لكن المخرج أصر وقال لو محضرتش المسرحية مش هنجحك؛ فاضطريت أقدم المسرحية، والحقيقة حسيت بسعادة كبيرة جداً وقتها، يمكن مكنتش حسيتها قبل كده، ومن وقتها قررت أمثل".
كما كشف النبوي عن حلمه الخاص قائلاً: “حلمي أخرج أول فيلم ليا، وهو مشروع قديم عن مدينة بورسعيد في مرحلة السبعينات مقدرش أقول تفاصيل أكتر عشان الحاجات ديه بتتسرق”.
واختتم: "أعتقد كمان إن مش هشارك في التمثيل إلا لو ملقتش الشخص المناسب لدور البطل إن شاء الله هبدأ الخطوة دي قريب جداً".
