دنيا ماهر: قلة ظهوري بعد مسلسل بـ100 وش مش تقصير.. ده رزق من عند ربنا‎

قالت الفنانة دنيا ماهر إن ابتعادها النسبي عن الساحة بعد مسلسل "بـ100 وش" ليس تقصيرًا من أحد، بل هو جزء من توزيع الأرزاق، موضحة: "أنا شايفة إن ده مش تقصير، لكن ده رزق من ربنا، ويمكن ده الرزق اللي بيجيلي، ولما بيجيلي حاجة، بنقي الكويس فيها وبجتهد فيها".

وأضافت دنيا، خلال حديثها في برنامح "واحد من الناس" المذاع على قناة الحياة، أن هناك أعمالًا جيدة لا تستطيع المشاركة فيها رغم إعجابها بها، بسبب تداخل التوقيتات، موضحة: "في أوقات بيجيلي أربع أعمال في نفس الوقت، وأكيد مش هقدر أعملهم كلهم مع بعض، فبختار أنسب اتنين وأشتغل عليهم".

وأكدت أن التزامها في العمل لا يعني التضحية بصحتها أو حياتها الشخصية، قائلة: "أكيد كلنا بنشتغل علشان نعيش بمقابل مادي كويس، لكن في الآخر دي مسألة التزام. مش كل الناس تقدر تشتغل في 4 أعمال مرة واحدة، وأنا واحدة من الناس اللي لازم أنام كويس، وآكل كويس، وعندي بيت لازم أرجع له وأعمل فيه حاجات، لأني بني آدم عادي".

واختتمت حديثها بالإشارة إلى ضغوط موسم رمضان قائلة: "في رمضان بيكون الضغط كبير جدًا، وده بيخليني أكتر حرصًا على اختياراتي وتوقيتات شغلي".