تامر حبيب يعلّق على تصريحات إيناس الدغيدي: ضغطي عليّ وسخنت والدنيا اتقلبت
كشف السيناريست تامر حبيب عن الجدل الذي أثارته تصريحات المخرجة إيناس الدغيدي، قائلاً: "اتخضيت جدًا... كنت في دبي وراجع على مصر، صحيت من النوم لقيت الدنيا مقلوبة، واستغربت من الكلام اللي اتقال"، مضيفًا ضاحكًا: "قلت ده أنا كده هتمسك في المطار".
وأضاف حبيب خلال ظهوره في بودكاست "فايق ورايق": "مكنتش فاهم حاجة، أنا عارف إنها بتحبني، بس اتفاجأت بالكلام، ومقدرتش أستوعب، يومها كان افتتاح مهرجان القاهرة السينمائي، وقررت ما أروحش، لأني كنت متأكد إن الناس هتسأل، ووقتها الضغط عليّ والحرارة عليت، وقعدت أقول: هو أنا عملت إيه؟".
وأكد أن إيناس الدغيدي حاولت التواصل معه لتقديم الاعتذار، لكنه تجاهل الرد، قائلًا: "الناس كلها كلموها، وعملوا اللي المفروض يتعمل وزيادة، وهي مكانتش عارفة تعمل إيه".
وتابع: "لما استضافوها في أحد البرامج وسألوها عني، قالت: تامر ده حبيبي، وأنا ماكنتش أقصد كده أبدًا، وهو كان زعلان جدًا، حتى محضرش المهرجان"، واختتم ضاحكًا: "أنا قايل إني محضرتش المهرجان عشان كنت عيَّان، فقلتلها: مش انتِ عايزة ترضيني، اسكتي".