زينة في تصريح جريء: زمان كنت بشتغل مع مخرجين جبتهم من على القهوة!
كشفت الفنانة زينة، عن أبرز المحطات التي أثّرت في شخصيتها الفنية وحياتها الخاصة، مؤكدة أنها أصبحت أكثر نضجا في قراراتها مع مرور الوقت، قائلة: "الحياة بتتعقّد لما بنكبر، وبننكلكع، وبقيت أقول لا أكتر من آه، وده في حياتي الشخصية والمهنية، ومهما ندمت على لا، فهي ندمها أقل".
وأضافت خلال لقائها في برنامج "أسرار النجوم" عبر إذاعة نجوم إف إم، أنها لم تعد تقبل المجازفة بالتعامل مع مخرجين غير متمرسين، قائلة: "زمان كنت بشتغل مع مخرجين جبتهم من على القهوة، وكنت فاكرة إني بعرف أختار، لكن اتعلمت إن مش أي حد ينفع أشتغل معاه، ومش هجرب في نفسي تاني. أي مخرج جديد لازم يثبت نفسه الأول، وأنا أسلمه نفسي وأنا مطمنة".
وعن مسلسل "الليلة واللي فيها"، أكدت أنها شعرت بالرهبة منذ اللحظة الأولى لقراءة السيناريو، قائلة:" اتخضيت من أول صفحة، وكان واضح إن الورق معمول عشاني، ما فكرتش أقول آه أو لأ، قررت فورًا أعمله، ولما بدأنا تصوير، كنت مبهورة".
وتابعت أن شخصية "رشا" استغرقت عامًا كاملًا من التحضير، بالتعاون مع المخرج هاني خليفة، قائلة: "قعدنا شهور نشتغل على الشخصية، وده الطبيعي زي ما حصل معايا قبل كده في "واحد صفر" مع أستاذة كاملة أبو ذكري، لازم أتعب علشان أوصل الشخصية للناس".
أشارت زينة إلى أن أحد أصعب المشاهد في المسلسل كان لحظة دخول الفنانة سماح أنور عليها، قائلة: "وقتها حسيت برعشة كأن روحي طلعت، وسماح أنور كانت بتدعمني دايمًا، وبتقولي إن الدور صعب، وتنقل لي خبرتها، وعلّمتني أفصل نفسي عن كل اللي حواليا في اللوكيشن".
وأضافت أن المخرج هاني خليفة لم يجامِلها بكلمة "برافو" إطلاقًا، لكنها كانت تشعر بالتقدير من نظرته، مؤكدة: "اتعلمت منه حاجات هكمل بيها في شغلي، وأنا مؤمنة إن اللي ما بيتعلمش من تجاربه جاهل، وللأسف بقينا في مجتمع سريع فقدنا فيه الأصول والرقي".
واختتمت زينة حديثها قائلة: "زمان كنت حابة أدوار معينة، دلوقتي بقول للمخرج شوفني بطريقتك، وقدم لي شخصية تستحق، أنا عليا أشتغل بضمير، والباقي عندك".