عفاف شعيب لـ"وشوشة": انتشر كلام إن فاتن حمامة حاربت مسلسل أفواه وأرانب ووقفوا عرضه وكانوا بيبعتوا جواسيس عندنا

قالت الفنانة الكبيرة عفاف شعيب، في ندوة فنّية بموقع "وشوشة"، بحضور رئيس التحرير عمرو صحصاح، إنّ مسلسلها أفواه وأرانب، تم تقديمه قبل الفيلم الذي حمل نفس الاسم وكان من بطولة الفنانة الراحلة فاتن حمامة.

عفاف شعيب أكدت أنّ مسلسلها تمت محاربته بشكل كبير جدًا، وتم إيقاف عرضه بعد نجاح أول 5 حلقات منه، مؤكدة أنّ تردّدت حينها أقاويل بأنّ سيدة الشاشة العربية فاتن حمامة هي من وراء محاربة المسلسل وقامت بتقديمه بعدها في عمل سينمائي.

وكشفت شعيب تفاصيل الأزمة وقتها في تصريح خاص لـ"وشوشة" قائلة: مسلسلي اللي عملته باسم أفواه وأرانب اتعمل قبل الفيلم، وللأسف اتحارب حرب شديدة من فنانة ما، واتوقف بعد عرض الحلقة الخامسة منه.

وأضافت: فنانة وقفت ضد المسلسل وقالت دة بيسئ لسمعة مصر، ومطلعين الولاد بياكلوا الفول بإيديهم، رغم إنهم عملوا دة عندهم في الفيلم.

وتابعت: لما صورنا المسلسل فوجئنا بإنهم بيبعتوا جواسيس من عندهم لينا والأستاذ حسين كمال هو اللي بلغنا بإنهم بيتجسّسوا علينا عشان يعرفوا بنصور إيه، وفعلًا لما سمعوا إننا قربنا نخلص التصوير راحوا عملوا الفيلم.

وأردفت عفاف شعيب: لما الحلقات الأولى من المسلسل اتعرضت، نجح نجاح كسر العالم كله بس في الدول العربية، واتكتب عني في الجرائد وقتها "تفوقت الفنانة الجديدة عفاف شعيب على فيلم أفواه وأرانب".

واختتمت: تردّدت أقاويل وقتها إن فاتن حمامة هي اللي حاربت المسلسل واتقال كمان إنّ في ناس معاها من الفيلم هما اللي وقفوا ضده، الله أعلم مين، لكن أنا بعد إيقاف عرض المسلسل، زعلت جدًا ولما تقابلت مع وزير الإعلام وقتها صفوت الشريف وبلغته باستيائي وحزني من اللي حصل ولما قالي هنعرضهولك دلوقت قلتله خلاص فقد قيمته وربنا عوضني بالشهد والدموع.