آثار الحكيم تكشف لـ"وشوشة" تفاصيل حياتها بعد الاعتزال: بحفظ القرآن وبصلي
يحل اليوم الاثنين 24 أغسطس، يوم ميلاد الفنانة آثار الحكيم، التي ابتعدت عن الساحة الفنية منذ سنوات، مفضلة التفرغ لحياتها الخاصة والعبادات.
وقالت الفنانة آثار الحكيم في تصريح خاص لـ”وشوشة”: “أنا بصراحة ببقى ناسية يوم عيد ميلادي، وسبحان الله بلاقي حبايب كتير بيكلموني في اليوم ده، بقالي أكتر من 30 سنة مبفتكرش اليوم ده، ودايمًا لما تعدي سنة من عمري بحط في دماغي إني خلاص بقرب من الامتحان الكبير، ونرجع لربنا".
وأضافت الفنانة آثار الحكيم : “أنا من فضل الله بقالي 15 سنة معتزلة الفن، وحاسة إني شبعت من الفن ومش محتاجة حاجة تانية منه، أنا حاليًا قاعدة في البيت بحفظ القرآن وبصلي الفروض اللي عليا، وأي إنسان بيتشبع من تجربة معينة أو حاجة معينة خلاص، ودي طبيعة ربنا خالقنا كده".
وتابعت الفنانة آثار الحكيم حديثها عن مراحل حياة الإنسان قائلة: “إحنا أطفال بنلعب ببراءة فترة، وبعدين المراهقة والتمرد، وفي فترة الشباب بنحاول ننجح ونثبت نفسنا ونكبر، وبعدين نبدأ نحب ونرتبط ونتجوز ونخلي حياتنا سيناريو واحد".
وأوضحت أن الإنسان يجب أن يتعلم من تجارب الآخرين، قائلة: “الحكمة بتقول اتعظ من لم يتعلم من تجارب الآخرين، يعني أشوف اللي قبلي حصل لهم إيه وأتعلم منهم، مش أقول لا أنا مش هيحصل لي زيهم".
واستكملت: “كلنا لازم نكبر ونعجز، ودي على فكرة من نعم ربنا علينا، وليه نعمة العجز؟ لأن ربنا من حبه فيك يقول لك: فلما بلغ أشده واستوى وبلغ أربعين عامًا".
واختتمت آثار الحكيم حديثها برسالة عن أهمية التقرب إلى الله، قائلة: “كنا الأول نلبس ونتعايق ونخرج، لكن المفروض تقرأ قرآن كل يوم ونسبح ربنا ونصلي".
