عمرو المصري لـ"وشوشة": رامي جمال تحمس لـ”السهرة حلوة” من أول مرة سمعها

شارك الشاعر عمرو المصري في ألبوم دي علامة للفنان رامي جمال من خلال أغنية “السهرة حلوة”، وكشف كواليس كتابة الأغنية، ورد فعل رامي جمال عليها، وأسباب حماسه لتقديمها ضمن الألبوم.

وتحدث عمرو المصري في تصريح خاص لـ"وشوشة"، قائلًا:"السهرة حلوة أغنية مبهجة جدًا، وفي نفس الوقت فيها كلام حب ومغازلة، وبتتكلم عن اتنين بيحبوا بعض، بيسهروا ويخرجوا ويقضوا وقت حلو مع بعض، ودي الحالة اللي كنا عايزين نوصلها".

عمرو المصري: أغنية السهرة حلوة اتكتبت على لحن كان جاهز

وأضاف عمرو المصري قائلاً:"الأغنية اتكتبت على لحن كان جاهز، بعد ما عمرو الخضري عمل اللحن أنا كتبت الكلمات عليه، والحمد لله طلعت بالشكل ده، وأول ما رامي سمعها عجبته على طول".

وتابع عمرو المصري حديثه قائلاً:"رامي أول ما سمع الأغنية حس إنها جديدة ومبهجة، وجرب صوته عليها، ولما غناها اقتنع بيها جدًا، والحمد لله اتوفقنا فيها".

وعن طبيعة كلمات الأغنية، قال:"الكلمات معمولة على فكرة الحب المبهج، زي (معاك السهرة حلوة)، و(جمال عينيك جابوني)، و(الغرام قتال)، فيها شوية جمل غزل، وفي نفس الوقت بتتكلم عن السهرة، وده يخليها ممكن تتقال للحبيب أو للحبيبة بشكل طبيعي".

واختتم عمرو المصري حديثه بالإشارة إلى تعاونه الآخر مع رامي جمال داخل الألبوم، قائلًا: “كمان أنا سعيد بأغنية (ليلة ورا ليلة) اللي جمعت رامي جمال وسعد لمجرد في نفس الألبوم، ودي من الأغاني اللي بحبها جدًا، والحمد لله حققت نجاحًا كبيرًا".