أمين نبيل: رامي جمال يقدم نفسه بشكل موسيقي جديد في ألبوم دي علامة
شارك الموزع الموسيقي أمين نبيل في ألبوم دي علامة للفنان رامي جمال، من خلال توزيع أربع أغنيات هي إيه اللي جابك، وفي لياليها، والأوقات الحلوة، وبتفتكريني، والتي جاءت ضمن أغاني الألبوم الذي طُرح مؤخرًا وحقق تفاعلًا واسعًا بين الجمهور.
وتحدث أمين نبيل في تصريح خاص لـ"وشوشة"، عن كواليس مشاركته في الألبوم، مؤكدًا أن أكبر تحدٍ بالنسبة له كان تقديم أفكار موسيقية جديدة، قائلًا:"التحدي بالنسبة لي دايمًا إني أعمل حاجة جديدة معملتهاش قبل كده، وفي نفس الوقت يكون فيها شخصيتي الفنية، وفي الأغاني الأربع كان لازم أقدم مع رامي توزيعات مختلفة ومناسبة لموضوع كل أغنية".
وأضاف أمين نبيل :"رامي فنان كبير وأنا بحب ذوقه الموسيقي جدًا، ولما بيسمعني الأغاني ببقى عارف إني هسمع حاجة مختلفة، والجديد في الألبوم ده إنه عامل أشكال موسيقية جديدة عليه وأفكار أغاني معملهاش قبل كده، ودي حاجة بتحسب له لأنه دايمًا بيحب يطور نفسه".
أمين نبيل عن التعاون مع الفنان رامي جمال
وعن طبيعة العمل مع رامي جمال، قال: “أنا ورامي أصحاب من زمان، وده بيسهل علينا طريقة الشغل، ولما تشتغل مع فنان فاهم وعارف هو عايز إيه بالظبط، الموضوع بيكون أسهل بكتير، وكمان ذوقه في المزيكا متطور ودايمًا بيدور على الجديد اللي يليق عليه، والحقيقة كل الناس اللي اشتغلت في الألبوم تعبت جدًا علشان يطلع بأفضل نتيجة".
وأشار أمين نبيل إلى أنه استمتع بالعمل على جميع الأغنيات التي شارك فيها، موضحًا: “أنا حبيت كل الأغاني اللي اشتغلتها، وكنت متحمس جدًا للتعاون بين رامي جمال وعمرو مصطفى لأول مرة، وكمان صديقي الشاعر تامر حسين كاتب مواضيع مختلفة كعادته، وكل أغنية بالنسبة لي كانت حالة خاصة، والمتعة الحقيقية إني أقدم أغنية حلوة، علشان كده كل أغنية اشتغلت عليها كانت مميزة بالنسبة لي.”
واختتم أمين نبيل حديثه قائلًا: “النجاح محدش يقدر يتنبأ بيه، لكن أتمنى الألبوم كله ينجح ويسيب أثر حلو عند الناس يمكن إحنا كشعب بنحب الأغاني الدرامية أكتر، ورامي عامل مجهود كبير في تنويع الأغاني والأشكال الموسيقية، وبالنسبة لي أغنية (بتفتكريني) من أكتر الأغاني اللي حابب حالتها وموضوعها، وإن شاء الله الألبوم كله يعجب الجمهور.
