محمد عاطف لـ”وشوشة”: استوحيت كلمات “لسه باقي عليك” من جملة سمعتها صدفة
كشف الشاعر محمد عاطف كواليس كتابة أغنية “لسه باقي عليك” ضمن ألبوم “القمر” للفنان رامي صبري، مؤكدًا أن فكرة الأغنية جاءت من جملة سمعها بالصدفة وأعجبته، فقرر أن يبني عليها حالة غنائية كاملة.
وقال محمد عاطف في تصريح خاص لـ”وشوشة”: “أنا بحب أكتب الحالات المتصالحة، يعني لما حد يكون متخانق مع حد ويحاول يرجع له أو يصالحه. وفي مرة سمعت حد بيقول جملة “أنا لسه باقي عليك”، عجبتني جدًا، فخدتها وبنيت عليها موضوع الأغنية".
وتابع: “بعد ما خلصت الكلام بعته لرامي صبري، وقعدت شهور من غير ما أعرف إيه اللي هيحصل، وبعدها فوجئت بيه بيسمعهالي متلحنة ومتغنية، واتبسطت جدًا لأن رامي من الأصوات الحلوة اللي بحب أشتغل معاها".
وأضاف: “كانت مفاجأة جميلة بالنسبة لي إن رامي هو اللي لحن الأغنية وكمان وزعها، لأن أنا عارف إنه بيشتغل مع مجموعة من الموزعين، فاتبسطت جدًا إنه قرر يقدمها بالشكل ده".
وعن تعاونه مع رامي صبري، قال: “رامي من أكتر الأصوات اللي أنا بتنبأ لها بالاستمرار، لأنه فنان فاهم جدًا، عنده وجهة نظر في الكلام والألحان والتوزيع والمزيكا وحتى هندسة الصوت، وده بيخليه نجم يستحق المكانة اللي وصل لها".
وأوضح: “إحنا من جيل واحد وبادئين من زمان، لكن تعاوناتنا زادت مؤخرًا، والحمد لله قدمنا أعمالًا ناجحة، ومع الوقت رامي بيثبت إنه جدير يبقى واحدًا من كبار نجوم الوطن العربي".
وعن شعوره قبل طرح الأغنية، أكد محمد عاطف: “في مطربين الواحد بيبقى قلقان وهو بينزل معاهم أغنية، لكن مع رامي صبري كنت مطمن جدًا، زي ما بيقولوا كده حاطط في بطني بطيخة صيفي، لأنه فنان ناجح عن جدارة ومسيرته كلها مليانة أغاني ناجحة".
وأشار إلى أنه يحضر لعدد من المفاجآت خلال الفترة المقبلة، لكنه يفضل عدم الكشف عنها في الوقت الحالي، قائلاً: “عندي أكتر من مشروع جديد، لكن بقينا نحافظ على السرية شوية لحد ما ييجي وقت الإعلان الرسمي".
ويُعد محمد عاطف واحدًا من أبرز شعراء الأغنية في مصر والوطن العربي، حيث نجح على مدار السنوات الماضية في تقديم العديد من الأغنيات الناجحة التي حققت انتشارًا واسعًا، بفضل أسلوبه المميز وقدرته على التعبير عن المشاعر الإنسانية ببساطة وصدق، ما جعله من الأسماء الأكثر حضورًا وتأثيرًا في الساحة الغنائية.
