سمية درويش لـ«وشوشة»: فوجئت بتحول أغنياتي إلى تريند.. وابتعادي جاء بسبب ظروف شخصية صعبة

كشفت المطربة سمية درويش كواليس النجاح المتجدد لأغانيها القديمة، مؤكدة أنها لم تكن تتوقع عودتها إلى الواجهة وتحقيقها انتشارًا واسعًا عبر منصات التواصل الاجتماعي، وذلك خلال ندوة نظمتها مجموعة «وشوشة» الإعلامية لتكريمها والاحتفاء بمشوارها الفني.

وقالت سمية درويش في تصريح خاص لـ«وشوشة»: “بصراحة أنا معرفش ليه أغنياتي رجعت تريند بالشكل ده، وكنت دايمًا بتفاجأ بالأمر. أغنية «إنت حياتي» كانت رابع أغنية من أغنياتي تحقق انتشارًا كبيرًا، وقبلها أغنيات تانية كانت بترجع للناس واحدة وراء التانية، لدرجة إن صحابي هما اللي كانوا بيبلغوني”.

وأضافت: “في الفترة دي مكنتش فاهمة قوي فكرة التريند بالشكل الموجود دلوقتي، وكان بالنسبة لي المقياس الحقيقي إن الأغنية الحلوة تفضل عايشة مهما مر عليها وقت. وكل مرة كنت بشوف أغنية راجعة للناس كنت بتخض وأقول الحمد لله، لأن اللي بيطلع من القلب بيوصل للقلب، حتى لو وصل متأخر”.

وعن فترة غيابها عن الساحة الفنية، أوضحت: “اختفيت بعد آخر ألبوم ليا بسبب ظروف حياتية صعبة ومتلاحقة. اتجوزت سنة 2019، وبعدها بفترة قصيرة حملت، ثم جاءت الولادة، وبعدها مباشرة دخلنا في ظروف جائحة كورونا، وكل ده أثر على استمراري الفني”.

وتابعت: “كمان في الفترة دي كان الإنتاج الفني أقل من السنوات السابقة، وحالتي وقتها ما كانتش تسمح إني أنتج لنفسي أو أركز في شغلي بالشكل اللي كنت متعودة عليه، فاضطريت أبعد لفترة لحد ما أقدر أرجع من جديد”.