شريف مكاوي لـ”وشوشة”: عشت مع أحمد سعد 7 شهور.. ومن هنا بدأت حكاية «أوبا»
كشف الشاعر والملحن والموزع شريف مكاوي كواليس صناعة أغنية “أوبّا” للنجم أحمد سعد، إحدى أغنيات ألبوم الفرفوش، والتي تولى فيها كتابة الكلمات والتلحين والتوزيع الموسيقي بالكامل.
وفي تصريح خاص لـ”وشوشة”، أكد شريف مكاوي أن الجمع بين مهام الكتابة والتلحين والتوزيع في عمل واحد كان تجربة ممتعة وصعبة في الوقت نفسه، قائلًا: “لما الفكرة بتطلع من شخص واحد بيبقى أسهل إن الرؤية توصل كاملة، لكن في نفس الوقت المسؤولية بتبقى مرعبة لأن النجاح أو الفشل بيبقى على كتفك لوحدك”.
وتابع: “من كتر التوتر والقلق مجمعتش أسمع الأغنية تاني يوم من نزولها، لكن الحمد لله ردود الفعل فرحتني جدًا”.
وكشف مكاوي عن اللحظة التي وُلدت فيها فكرة الأغنية، قائلًا: “كنت شغال مع أحمد سعد حوالي 7 شهور كمخرج موسيقي في حفلاته وسفرياته، ومن كتر ما عشت معاه وفهمت شخصيته، جتلي رغبة أعمله حاجة تليق بيه”.
وأضاف: “وأنا مسافر مع أحمد في الطيارة جتلي الجملة بالكلام واللحن مرة واحدة: (اللي قاله أوبّا قالوا أوبّا.. الجمال حبيبي أصله زيادة حبة)، وبعدها قعدت شهر كامل أشتغل على الفكرة والتوزيع”.
وأشار إلى أنه احتفظ بالأغنية لفترة طويلة خوفًا من رفضها، موضحًا: “بعد ما خلصتها قعدت معايا شهرين كاملين خايف أبعتها لأحمد سعد ويسمعها ومتعجبوش، لكن لما سمعتها لصاحب ليا وانبهر بيها، أخدت القرار وبعتها له، وفي ثواني لقيته عندي في الاستوديو بيسجلها”.
وأوضح أن أحمد سعد كان له دور مهم في تطوير الأغنية، قائلًا: “أحمد فنان عبقري وله بصمته الخاصة، وهو اللي اقترح كلمة (الشياكة) بدل كلمة تانية كنت كاتبها، وكمان غير فكرة الضمير في جزء من الأغنية علشان الجمهور يتفاعل معاه بشكل أكبر”.
وعن أصعب موهبة بين الكتابة والتلحين والتوزيع، قال مكاوي: “التلحين هو الأصعب لأنه محتاج جملة موسيقية مختلفة وتعيش، أما التوزيع فهو الأكثر مجهودًا لأنه بياخد وقت وتفاصيل كتير جدًا علشان الأغنية تطلع بالشكل النهائي”.
كما تحدث عن علاقته الطويلة بأحمد سعد، موضحًا: “إحنا أصحاب من سنة 2001 تقريبًا، والصداقة بينا سهلت حاجات كتير في الشغل، واشتغلنا مع بعض في أكتر من مشروع قبل (أوبّا)، منها توزيع أغنية (بغيب)، لحد ما وصلنا للتجربة دي”.
ويُعد شريف مكاوي من أبرز الأسماء الصاعدة في مجال صناعة الموسيقى، حيث نجح في تقديم نفسه كشاعر وملحن وموزع في الوقت نفسه، وهو ما انعكس على نجاح أعماله الأخيرة، خاصة مع قدرته على تقديم أفكار موسيقية مختلفة ومواكبة للذوق الحالي للجمهور.
