محامي ضياء العوضي: “اختفاء غامض قبل الوفاة.. وإعادة التشريح لكشف الحقيقة”
كشف مصطفى مجدي، محامي الدكتور الراحل ضياء العوضي، تفاصيل جديدة ومثيرة حول ملابسات الوفاة، وذلك خلال مداخلة هاتفية في برنامج كلام الناس المذاع عبر قناة MBC مصر.
طلب إعادة التشريح وتحقيقات موسعة
قال مصطفى مجدي: «طالبنا بإعادة تشريح الجثة عشان كان في بعض الشكوك والغموض حول الوفاة، وكان في فترة اختفاء قبل الوفاة غير مبررة عندنا، وزوجة المرحوم حررت توكيل وعلى أساسه قدمت الطلب، وبالتالي طلبنا ده وطلبنا صورة من التحقيقات الكاملة وتفريغ الكاميرات وتشريح الجثة».
وأضاف: «صدر قرار من النائب العام بالموافقة، واستخرجنا الجثة النهاردة، وتم التشريح وتم الدفن مرة تانية، لكن حاليًا في انتظار النتيجة».
وتابع: «إحنا لسه منقدرش نتكلم عن أي حاجة دلوقتي حول ملابسات الوفاة، والمعلن هو جلطة في القلب أدت للوفاة، ولكن بإذن الله تطلع النتيجة ونوصل للحقيقة، وبعد ما تطلع النتيجة هنعلن الطب الشرعي وصل لإيه».
واختتم حديثه قائلًا: «أنا مؤمن وموحد بالله أنا وكل اللي بيشكك في الموضوع، لكن في فترة غموض من يوم 12 ليوم 19 انقطعت كل سبل الاتصال ما بيننا وما بينه، وبعدين طلع بيان قالوا إنه متوفي من يوم 14، وده أثار شكوك لينا».
وأضاف: «ولو هو فعلًا مات في الفندق ليه الفندق مبلغش؟ ولو مات يوم 14 ليه محدش قال ولا السلطات بلغت؟ هو من يوم 12 لـ14 كان فين؟ لو إحنا عندنا إجابات أكيد مش هنعمل كده، ولو جه إجابات الموضوع هيكون اتقفل تمامًا بالنسبة لنا، ونتمنى من الله تكون الوفاة الطبيعية».
