كريم فهمي: وصلت للنضج في التعامل مع هجوم السوشيال ميديا

تحدث الفنان كريم فهمي عن رأيه في الهجوم الذي يتعرض له الفنانون عبر مواقع التواصل الاجتماعي، وعن رؤيته لهذا الأمر.

وخلال السطور التالية ينقل لكم موقع “وشوشة” أبرز تصريحاته خلال استضافته في بودكاست"G Talks" المذاع عبر موقع “يوتيوب”.

وأشار الفنان كريم فهمي إلى أنّ كل فنان في بداياته لا يكون على دراية كاملة بجميع تفاصيل المهنة، وقال: “أول ما بتبدأ بتبقى فنان لسه صغير، مش على دراية بكل حاجة بتحصل في المهنة، لكن مع الوقت والخبرات والتجارب بتبتدي تحس إن اللي بيتقال، اللي يقولوله كده يعني، فعلا هو عدى بمراحل كتير ومواقف كتير عشان كده قدر إنه يبقى في المكان ده”.

وأضاف: “يعني لما تشوف الجيل بتاع أحمد السقا، وحلمي، وعز، وكريم عبد العزيز هم طبعا عدوا حاجات كتير جدا، لذلك أنا بشوف إننا لازم نقدر الشباب الصغيرة ونبقى فاهمين إنه لسه، وفي حاجات مش فاهمها، ولسه ما عداش بالتجارب الكافية اللي تخليه شخص أكبر”.

مراجعة الذات مرحلة نضج قاسية

وتطرق كريم فهمي للحديث عن مراجعة الإنسان لنفسه، قائلا: “أنا جت على فترة بقيت بفكر فأنا إيه؟ بقيت براجع نفسي، وبشوف كريم فهمي من منظور الناس، يعني أنا بيني وبين نفسي عارف نيتي، لكن بدأت أشوفني من عيون الناس، لقيت إن أنا وحش في حاجات كتير جدا، وحبيت إني أعدلها، وده مش غلط أنا أعتقد إن دي مرحلة من مراحل النضج، لكنها قاسية جدا”.

قسوة المتابعين أقوى من قسوة الإنسان على نفسه

وفي إطار حديثه، تطرق الفنان كريم فهمي لرأيه في الهجوم عبر منصات التواصل الاجتماعي، قائلا: “فعلا أنا الأول ماكنتش فاهم إنه ممكن يكون في حاجة اسمها لجان، لكن الموضوع ده فعلا بقى حقيقي وممكن تعليقات الشخص اللي بينتقد تكون لجان، بس أنا وصلت لحالة من النضج وتكبير الدماغ اللي هو يعني أنت الكلمة اللي هتقولها دي هي اللي هتبسطك؟ أوكي قولها”.

هجوم غير مفهوم على فيلم "ديدو"

وروى كريم فهمي موقفا من الهجوم الذي تعرض له في أحد أفلامه وهو فيلم ديدو، قائلا: "أنا كنت بعمل فيلم من كام سنة اسمه ديدو، الفيلم ده كان فيه حاجات مختلفة، وأنا أصلا كنت عامله للأطفال، الفيلم ده قعدت أحضر فيه ثلاث سنين وتعبت جدا فيه كانت فيه صفحات بتكتب يا جماعة أوعى حد يخش فيلم ديدو، أنا خرجت بعد خمس دقايق من الفيلم وتلاقي ناس تانية ردة تقول طب كويس، ده أنا كنت داخل أنا وعيلتي".

وتابع: “لأن في ناس مش بتبقى فاهمة فعلا إن ده لجان، شوف بقى أنت ضاع عليك أعمال قد إيه وفرص قد إيه بسبب اللجان وده فعلا بيأكد إن في منافسة بتحصل بتكون غير شريفة بالمرة”.

المساس بالحياة الشخصية مرحلة أكثر خطورة

واختتم الفنان كريم فهمي حديثه مؤكدا أن هذه اللجان قد تتطرق إلى الحياة الاجتماعية أيضا، قائلا: “بجد كمان في نسبة بتتكلم علينا على السوشيال ميديا، الموضوع بقى غريب جدا وقاسي جدا، يعني إحنا أصلا عمرنا ما كان لينا خناقات مع ناس أنا ودانيا على موقع التواصل الاجتماعي، بس ابتدت من فترة كده يبقى لينا صور بينزلوا عليها كلام مش حقيقي في مشكلات إحنا مالناش دخل بيها”.