زينة: خُلقي ضيق في الشغل.. واتعلمت أختار المخرج قبل أي حاجة
كشفت الفنانة زينة أنها تعلمت الكثير من العمل، خاصة الصبر، وقالت: "خلقي ضيق في الشغل، واشتغلت مع مخرجين محترمين زي الأستاذ محمد أمين والأستاذة إيمان حداد"، مشيرة إلى أن العمل معهم ممتع ومحترم.
وخلال لقائها في برنامج "أسرار النجوم" عبر إذاعة نجوم إف إم، تحدثت زينة عن اختياراتها السابقة قائلة: "اشتغلت مع مخرجين جبتهم من على القهوة، مش كتير بس كنت عايزة أشتغل، وماكنش عندي الخبرة في التعامل مع المخرجين".
وأضافت: "اتعلمت من اللي حصل ومش هجرب في نفسي تاني، وأي مخرج جديد هقوله ما تجليش خالص.. اشتغل واثبت نفسك وبعدين نتعامل. لازم أختار الشخص من شغله، وأسلمه نفسي وأنا مطمنة إنه هيطلع مني أحسن حاجة".
وتطرقت زينة إلى تجربتها في مسلسل "الليلة واللي فيها"، وتحديدًا مشهد مواجهة الفنانة سماح أنور، وقالت:" لما الأستاذة سماح دخلت عليّ الغرفة حسيت برعشة كأن روحي طلعت، ومكنتش متخيلة هعدي اللحظة دي. وهي إنسانة ظريفة جدًا، وشحنتني بطاقة إيجابية، وكانت دايمًا تقولي إن الدور صعب وتنقل لي خبرتها، وهي دارسة علم نفس".
وأوضحت أنها تعلّمت منها كيف تفصل نفسها عن الأشخاص المحيطين بها أثناء التصوير:" درّبتني كتير ووصلتني لمرحلة إني مش شايفة حد حواليا، وقالت لي نصائح بقت جزء من حياتي دلوقتي، زي إن اللي يزعلك لازم يكون حد مهم".
واختتمت زينة حديثها حول الأدوار التي تطمح إليها، قائلة:" كان عندي أفكار كتير زمان، بس دلوقتي الأهم إن المخرج يشوفني بطريقته، ويقدمني في شخصيات حقيقية ومهمة. دوري أشتغل وأدي أقصى ما عندي، والباقي على رؤيته".