زينة: اتعلمت أقول "لأ" أكثر من "آه"!
أكدت الفنانة زينة أن نضج الإنسان يجعل الحياة أكثر تعقيدًا، وقالت: "إحنا بنكلكع لما بنكبر، والغلط بيبقى بفورة، لكن أنا من يوم ما اتولدت ما بعرفش غير أقول (لا)، عندي (لا) أسهل من (آه)، وقلت الكلمة دي كتير في حياتي الشخصية والعملية ومع أهلي".
وخلال لقائها في برنامج "أسرار النجوم" عبر إذاعة نجوم إف إم، قالت: "كانوا في الجامعة بيقولوا إني بشبه بينلوبي كروز، أما المخرج الكبير يوسف شاهين فقال إني بشبه صوفيا لورين، يمكن قال كده بسبب عظام وشي، بس هي أكيد أحلى مني، ويمكن فعلاً فيه شبه من بينلوبي".
وعن تجربتها في مسلسل "الليلة واللي فيها"، قالت زينة:" أول ما قريت الورق اتخضيت، وكان واضح إن المشروع مكتوب على أساس وجودي فيه، قالوا إنهم عايزين فكرة قوية وعمل مختلف. ما كانش عندي رفاهية الاختيار، قررت فورًا أشتغل، ولما بدأنا التصوير كنت منبهرة إزاي هنعمل الشغل ده".
أما عن كواليس تجسيد شخصية "رشا"، أوضحت زينة أن المخرج هاني خليفة قضى معها شهورًا في التدريب والتحضير، مؤكدة انهم ظلوا سنة في تحضير الشخصية.
وأضافت:" هاني خليفة عمره ما قال لي (برافو)، لكن كنت حاسة بالتقدير من عينيه، واتعلمت منه حاجات هافضل أكمل بيها في شغلي. طول ما إحنا شغالين لازم نتعلم، واللي ما بيتعلمش من تجاربه بيبقى إنسان جاهل. للأسف، بقينا في مجتمع سريع جدًا وما بقاش فيه أصول ولا فرص حقيقية للرقي اللي كنا عايشينه زمان".