أنغام باكية: “كفاية ظلم.. لست سبب أزمة شيرين
كشفت الفنانة أنغام عن تفاصيل أزمتها الصحية الأخيرة وردّت بحسم على الشائعات التي طالتها حول اتهامها بالوقوف وراء حملة الهجوم على زميلتها الفنانة شيرين عبدالوهاب بعد حفلها في مهرجان “موازين”.
وخلال مداخلة هاتفية مؤثرة في برنامج “كلمة أخيرة” الذي تقدمه الإعلامية لميس الحديدي على قناة ON، أوضحت أنغام أنها تمر بوعكة صحية منذ عدة أيام، وقالت:“أنا فعلاً في المستشفى من يوم السبت، حصلتلي أزمة صحية مفاجئة يوم الأربعاء وتم نقلي للمستشفى، وكنت محتاجة راحة وخصوصية".
وأضافت:“ماكنتش عايزة الناس تعرف لأن تعبي شديد ومش قادرة أستقبل زيارات توقعت إنها تبقى ليلة وأخرج، لكن طلع الأمر محتاج وقت أطول ورعاية أكتر. الحمد لله الأزمة بسيطة بس محتاجة صبر".
أما عن الجدل المثار على مواقع التواصل، فأكدت أنغام أنها فوجئت بحملة هجوم عليها تتهمها بالتحريض ضد شيرين، وقالت بانفعال:“أنا مش مصدقة أنا مش بتاعة مشاكل، ولا بدخل في مهاترات، وعمري ما رديت على شائعات، لكن المرة دي الظلم فاق التحمل وأنا على سرير المستشفى لقيت شتايم وتلميحات جارحة".
واستنكرت أنغام أن يتم زج اسمها في أزمة لا علاقة لها بها، موضحة:“أنا مالي؟! هو أنا ليّا علاقة باللي حصل في الحفلة؟! ناس بتتهمني وبتشتم وأنا في المستشفى، ده قمة الظلم".
وتابعت بصوت مكسور:“أنا اتحملت أربع سنين من التلميحات، حتى منها شخصيًا، وسكتت لكن لما نوصل لاتهامات بتحريض وتآمر ده عيب ومش هسكت تاني".
وأوضحت أنغام أنها بالفعل اتخذت خطوات قانونية ضد بعض المتجاوزين، قائلة:“في واحد كتب عني "مش هترحمي شيرين يا أنغام" ورفعت عليه قضية وكسبتها واتحبس، وأي حد هيكرر ده مش هسكت".
واختتمت رسالتها بتأثر واضح قائلة:“كفاية ظلم، كفاية كره، كفاية مقارنة مؤذية أنا اسمي أنغام، وشيرين اسمها شيرين. ليها جمهورها وليا جمهوري لو بتحبوني بجد، حبوني علشاني مش علشان أكون أحسن من حد".
وأكدت في رسالتها الأخيرة لجمهورها:“ما تقارنونيش بحد، ولا تقارنوا حد بيا. ده مش أسلوب دعم ربنا يكرمنا كلنا، بس سبوني في حالي".
