1. رضوى الشربيني: الراجل الصح أمان وخفيف دم ومايحاسبش الست على عطاياه

كشفت الإعلامية رضوى الشربيني عن رؤيتها لمواصفات “الرجل المناسب”، مؤكدة أن البداية الحقيقية لأي علاقة ناجحة يجب أن تقوم على القبول والشعور بالأمان.

وقالت خلال برنامجها “هي وبس”، المذاع عبر قناة DMC:

“الرجل الصح هو اللي وأنا بتكلم معاه ماحسش إني مرعوبة أو خايفة أتحاسب على كلمة.. الأمان بيبدأ من الإحساس إنك مش معرضة تتساب أو يتقلب عليك في لحظة”.

وتابعت رضوى حديثها عن المعنى الحقيقي للارتباط الناجح، موضحة أن وجود الرجل في حياة المرأة ليس مجرد شكل اجتماعي، بل لا بد أن يكون سندًا وظهرًا حقيقيًا.

وأضافت:

“لما أحس إن حياتي أمانة في إيده حتى لو مش موجود جنبي، أبقى مطمنة.. لو حصلتلي حادثة، أول واحد هييجي في بالي أكلمه هو، ولو فرحت بنجاح، أول حد هفكر أشاركه الفرحة هو برضو”.

أكدت الإعلامية رضوى الشربيني على أهمية الحوار والتفاهم المشترك بين الطرفين، قائلة:

“الرجل الصح هو اللي أقدر أتكلم معاه عن بكرة، ونحلم سوا من غير ما يخليني أحس إني مش قد أحلامي، أو يفكر إن كلمته لازم تمشي لمجرد إنه راجل.”

وأضافت:

“العلاقة لازم يكون فيها احترام، مفيهاش تقليل، ولا تذكير دايم بالعطاء.. مفيش حاجة اسمها ‘فاكرة لما عملتلك؟’ أو ‘كنتي تحلمي توصليني’.. ده مش حب، ده منّ.”

واختتمت حديثها بتأكيد على أهمية خفة الظل، قائلة:

“الراجل اللي دمه تقيل، حتى لو معاه ملايين، الحياة معاه بتكون صعبة.. الضحك مش رفاهية، دي ضرورة، لأن الأيام الصعبة محتاجة حد يهونها، مش يعقدها.”