مفيدة وسهير في الستات: "ارحموا شيرين.. دي كيان بيتكسر!"
علّقت الإعلاميتان مفيدة شيحة وسهير جودة على الجدل المثار حول الفنانة شيرين عبد الوهاب بعد ظهورها في حفلها الأخير بمهرجان "موازين" بالمغرب، والغناء بتقنية "البلاي باك"، وسط موجة من الانتقادات على مواقع التواصل.
مفيدة بدأت خلال برنامجها "الستات" المذاع عبر قناة النهار، وقالت: "مش فاهمة ليه الناس مش بتسيبها في حالها، هما بيحاولوا يكسروها، كل مرة تظهر فيها بيتصيدوا لها الغلط، مع إن اللي عملته بيحصل من فنانين كتير. البلاي باك ده شيء معتاد، مش جريمة."
وأضافت: "شيرين لسه بتتعافى، ودي أول طلعة ليها بعد غياب طويل، يعني المفروض نستقبلها بالحب مش بالهجوم، شيرين دي واحدة مننا. "
وقالت سهير جودة: "آه البلاي باك ممكن يكون مقبول لو اللي قدامي مش مطرب، لكن لما يبقى اسم كبير زي شيرين، الجمهور بيبقى رايح منتظر يسمع صوتها الحقيقي بس رغم كده، مش معقول الهجوم العنيف ده."
ثم تابعت: "شيرين بتتعرض لحاجات صعبة كتير، واحنا محتاجين نكون إنسانيين شوية، دي مش مجرد مطربة، دي كيان مصري وعربي كبير، لازم ندعمه مش نهدّه."
واختتمت مفيدة كلامها برسالة مؤثرة: "كل مرة تعمل حاجة، الناس تنتقدها تختفي يتكلموا، ترجع ينتقدوا، تنزل فيديو يهاجموها شيرين بتتظلم كتير.. يا جماعة ارحموها."