غنوة الموجي تفضح أخطاء الإذاعات: ألحان والدي تُنسب لبليغ والسنباطي

أعربت غنوة محمد الموجي، ابنة الملحن والموسيقار الكبير محمد الموجي عن استيائها من تكرار الأخطاء في نسب ألحان والدها الراحل، وكان آخرها ما حدث مع إذاعة أغنية “أحبك” التي نسب لحنها للموسيقار بليغ حمدي عن طريق الخطأ.

وقالت غنوة في تصريح خاص لـ" وشوشة " :“اتصدمت النهارده لما سمعت إن أغنية أحبك نسبت لنبيل حمدي! مش دايمًا بيغلطوا فيها، لكن واضح إن في خطأ موثق أو الأرشيف فيه مشكلة، ومش عارفة السبب ما تواصلتش مع الإذاعة المرة دي، لكن أنا عارفة إن بوستاتي بتتشاف وغالبًا لما بيشوفوها بيتداركوا الخطأ دي مش أول مرة، سبق وغلطوا في أغنية بدأنا بالسلام لأم كلثوم، ونسبوها لرياض السنباطي وهي لوالدي محمد الموجي، وفعلاً بعد ما نوهت على السوشيال ميديا تم تصحيح الخطأ”.

لم نلجأ للقانون.. لكن الأخطاء مستمرة

وحول مدى تكرار هذه الأخطاء، أوضحت:“للأسف، ألحان والدي هي أكتر ألحان بيحصل فيها لخبطة مرة ينسبوها لرياض السنباطي، مرة لبليغ، مرة لمنير مراد، ومش عارفة هل دا تقصير ولا الأرشيف نفسه فيه أخطاء ومش بناخد خطوات قانونية، لما بيتواصلوا معايا وبقولهم على الغلط بيصلحوه، ومبنكبرش الموضوع”.

“أحبك” أغنية خفيفة بلا قصة خاصة

أما عن كواليس أغنية “أحبك”، فقالت:“هي مش مرتبطة بقصة معينة، كانت ضمن أغنيات فيلم معبودة الجماهير وكانت أغنية خفيفة ولطيفة للمستمع، وفي نفس الفيلم كمان كانت أغنية جبار”.

تقصير إعلامي في توثيق تراث الموجي

وعن توثيق تراث والدها في الإعلام والإذاعة، أشارت غنوة إلى وجود تقصير واضح:“أنا لما بسمع إذاعات فنية بلاقي كل الملحنين بتتقال أسماؤهم صح، وييجي عند محمد الموجي ويغلطوا! اشمعنا؟ ليه مفيش حرص على الدقة في أعماله؟!”.

كتاب موثق لأعمال محمد الموجي قريبًا

وحول إمكانية إصدار أرشيف فني لتوثيق أعمال والدها، كشفت غنوة عن مشروع قيد التنفيذ:“أنا مش هعمل أرشيف بنفسي، لكن بيتحضّر كتاب كامل وموثق بأعمال محمد الموجي وهيتم طرحه بإذن الله في ذكرى وفاته، علشان الإذاعات تقدر ترجع له وتتجنب الأخطاء”.

علاقة خاصة بين الموجي والعندليب

وفي ذكرى ميلاد العندليب عبد الحليم حافظ، علّقت غنوة عن العلاقة التي جمعته بوالدها قائلة:“كانت علاقة أبوّة رغم إن فرق السن بينهم مش كبير، يمكن ٥ سنين، لكن والدي كان بيعتبر عبد الحليم ابنه، وكانت العلاقة بيننا وبين عائلة عبد الحليم علاقة صداقة حقيقية”.

رسالة للإذاعات والجمهور

وفي ختام حديثها، وجهت غنوة محمد الموجي رسالة إلى كل المعنيين بتوثيق التراث الغنائي:“ياريت يتحروا الدقة في توثيق أعمال والدي دا مش بس احترام لفنه، دا كمان حفاظ على التاريخ وتعب سنين عمر كاملة مفيش أسوأ من إن إنجاز يتنسب لحد تاني، واللي تعب يضيع حقه”.