حوار.. رانيا منصور: حلمي أعمل دور تاريخي عن الحضارة الفرعونية
في عالم الدراما الذي يشهد تنافسًا كبيرًا، استطاعت الفنانة رانيا منصور أن تبرز كإحدى النجمات الشابات اللواتي يمتلكن موهبة استثنائية وحضورا لا ينسى بأدائها المتقن واختياراتها الفنية الدقيقة، خطفت رانيا الأنظار منذ بداياتها، وأثبتت أنها قادرة على التلون بأدوار مختلفة تلامس قلوب المشاهدين.
وكان لموقع "وشوشة" حوار خاص مع الفنانة رانيا منصور حيث تحدثنا عن كواليس دورها المثير للجدل في مسلسل "رقم سري" وتجربتها في تقديم شخصية مليئة بالغموض والتحديات، ورؤيتها لتطور الدراما المصرية في السنوات الأخيرة.
حدثينا عن كواليس اختيارك لدور الموظفة في البنك المتهمة بسرقة حسابات ندى عشماوي وكيف رشحت لهذا الدور؟
اللي رشحني أستاذ محمود عبد التواب المخرج لما عرفت أنه هو المخرج وافقت، ولما عرفت أن ده الجزء الثاني من المسلسل وافقت لأني كنت بحب الجزء الاولاني، وكان عجبني أوي، ولما اترشحت للجزء التاني اتبسط جدا لأني بقيت ضامنة 50% من نجاح المسلسل والشغل مع ياسمين الرئيس واحنا صحاب من زمان بس أول مرة نشتغل مع بعض، ويكون لينا مشاهد مع بعض كان لينا مسلسل "أنا شهيرة أنا الخائن" بس مكنش لينا مشاهد مع بعض فيه كنت مبسوطة أوي أننا اشتغلنا مع بعض.
الشخصية التي قدمتها كانت غامضة ومليئة بالشكوك كيف تمكنت من إيصال تلك الحالة للجمهور؟
كل أبطال المسلسل كانوا شخصيات غامضة بما فيهم شخصية ميرنا بس هي كانت واضحة كانت شخصية غيورة طول الوقت بتتغير من لقاء كان نفسها تاخد المنصب اللي هي خدته في ده اللي بيحركها دائما في تصرفاتها أنها غيرانة عايزة تبقى في مكانة أحسن وكمان لما عرفنا أنها ساكنة في حي شعبي في طول الوقت حاسة أنها عايزة تبقى في مكانة أحسن في لما بتتلاقي حد خد الفرصة دي بتتغير منه، وده اللي بيحركها طول الوقت في كل تصرفاتها، شخصية جميلة جدا والحمد لله أن أنا عملتها والناس انبسطت.
من وجهة نظرك، كيف تساهم الأعمال الدرامية في توعية الناس بشأن القضايا المالية والجرائم المتعلقة بها؟
أكيد الأعمال الدرامية بيبقى ليها تأثير في الناس يعني أنا من وأنا صغيرة كنت منبهرة في التلفاز والسينما، وكنت بتفرج عليها، وكنت دايما ببقى متأثرة بالأحداث اللي بتحصل والكلام اللي بيقوله الممثلين احنا اتربينا على أن الافيهات اللي بيقولها الممثلين احنا نقولها في الحياة في الأعمال الدرامية بتتأثر جدا جدا لما بتسلط الضوء على حاجة معينة مكنش الناس واخده بالها منها أو مشاكل معينة بتمر بيها الناس في أكيد بتبقى حاجة مؤثرة.
الدور كان مرتبطا بجريمة قتل واختلاس كيف ترين تأثير هذه النوعية من الأدوار على المجتمع؟
دي أحداث متخيلة ملهاش علاقة بالواقع أوي، ولكن ممكن تحصل بس هي أحداث متخيلة هدفها مكنش توعية الناس على قد ما هو إمتاع الناس بحالة فنية احنا مكناش مركزين أوي إن احنا نوعي الناس على حاجة معينة عشان هي أحداث متخيلة من أحداث حقيقية.
كيف تري تأثير مشاركتك في مسلسل "رقم سري" على مسيرتك الفنية؟
مسلسل رقم سري لذيذ جدا عن الدور والمسلسل وتأثيره في مسيرتي الفنية مقدرش أحكم لأني أنا بيجيلي مسلسل ببقى حابه أمثل فيه اعمل دوري على أحسن حاجة ممكن تتعمل، لكن مسيرتي الفنية أتسال عليها لما أكبر في السن خالص نشوف إيه الأعمال اللي عملتها في أثرت في الناس ازاي بس دلوقتي مقدرش أحكم، ولكن أنا راضية عن المسلسل وراضية عن اللي أنا قدمته والحمد لله أن الناس كانت مبسوطة.
كيف تنظرين إلى تطور الدراما المصرية في السنوات الأخيرة؟
الدراما متطورة جدا جدا بنشوف مواضيع مختلفة وجديدة في الدراما بتتقدم السنين اللي فاتت، وفي تنوع في المسلسلات في مسلسلات أكشن، مسلسلات رومانسي، مسلسلات كوميدي، مسلسلات رعب في تنوع كبير، بس أنا شايفه أننا نقدر نوصل لمستوى أحسن من كدا.
من الفنانين الشباب، من منهم تري أنهم يشكلون مستقبل الدراما في مصر؟
في فنانين بيشكلوا مستقبل الدراما في مصر توانا الجوهري، حمزة دياب، جيسيكا حسام، لينا صوفيا الأولاد كلهم اللي كانوا مع توانا في كامل العدد، أنا شايفه إنهم عندهم مستقبل لذيذ في كمان أحمد غزي، نور النبوي، ياسمين العبد في كثير أولاد صغيرين وشاطرين ظهروا الفترة اللي فاتت.
كيف ترى تأثير السوشيال ميديا على الفن والدراما الآن؟
طبعا مؤثرة جدا الفن والدراما بياخد المواضيع من الناس أكثر من السوشيال ميديا لو ظهرت حكايات ليها علاقة بالسوشيال ميديا زي مسلسل أعلى نسبة مشاهدة كان بيتكلم عن السوشيال ميديا والتيك توك في دي حكاية اتخذت من أحداث حصلت في الحقيقة في ممكن يكون لها تأثير، وناخد منها حكايات تتقدم في الدراما بس السوشيال ميديا بتنقل أخبار الفنانين بتنقل أخبار عامة بقت تسهل حياة الناس طبعا زيها زي أي حاجة لها جانب إيجابي وجانب سلبي بس الواحد هو اللي يختار بياخد أنهي جانب فيهم بيخدم حياته، ويخدم الناس دي، ويطور نفسه أنت دايما اللي بتختار تاخد أنهي طريق تمشي فيه.
ما هو الدور الذي تحلمين بتقديمه، ولم تأتي الفرصة بعد؟
بحلم أن أعمل دور يكون فيه غناء ورقص مع التمثيل.
هل تفكرين في خوض تجربة الإنتاج أو الإخراج يوما ما؟
تجربة الإخراج مش بفكر فيها خالص بس تجربة الإنتاج ممكن أفكر فيها بس مش دلوقتي.
لو أتيحت لك فرصة تمثيل دور حقيقي مستوحى من شخصية عامة، من تختارين ولماذا؟
أنا نفسي أشارك في عمل يكون تاريخيا، يكون بيتكلم عن الحضارة الفرعونية لأن لما بتتفرج على أفلام ومسلسلات بتتكلم عن الحضارة الرومانية، واليونانية وبنبقى منبهرين بالإنتاج الضخم واللبس وشكل الممثلين وبالأحداث في الحاجات كلهم دي بتبقى لذيذة أوي، نفسي أشوف حاجة تبقى ليها علاقة بالحضارة الفرعونية ليها علاقة بينا كمصريين، دي حاجة حاسة إننا مش بنعملها معرفش ليه، في نفسي أشارك في عمل زي ده.
هل لديك مشاريع جديدة يمكنك مشاركتها معنا قريبا؟
لسه مفيش مشاريع جديدة، وإن شاء الله يكون فيه قريبا.
كيف توازن بين حياتك المهنية والشخصية؟
لما يكون عندي شغل بركز فيه أوي، ولما بخرج بره الشغل وعندي وقت فراغ بقضيه مع أهلي وبنتي وأصحابي طول الوقت.
ما النصيحة التي تقدمينها للممثلين الشباب الذين يريدون دخول المجال الفني؟
دايما أنا بشوف إن الهدف في حد ذاته هو وسيلة؛ لأنك تتطور من نفسك بها في رحلة إنك توصل للهدف اللي انت عايزه أنت بتتطور أنت بتتعلم أنك تنمي مهاراتك، لو أتكلم عن مجال التمثيل الفنانين لازم يهتموا بنفسهم، بشكلهم، بجسمهم لازم يهتموا بأكلهم، لازم يتمرنوا على حاجات كثير تمارين رياضية لو يعملوا أدوار أكشن لو يعملوا أدوارا فيها حركة، يتمرنوا على رقصات معينة لو في رقصة في فيلم أو مسلسل، يمرنوا صوتهم لو في غناء، الحاجات كلها دي مهارات بتكتسبها في الآخر عشان توديك في حتة أحسن عشان توصل للهدف اللي أنت عايزه، طول ما انت بتنمي مهاراتك طول ما أنت بتخلي الهدف هو اللي يقرب لك مش انت اللي بتكون تسعى للهدف.