عمرو مصطفى لـ"وشوشة": أي حد معداش 30 سنة هعمله أغاني وابعدوا عني ومتجيبوش سيرتي لا بحلو ولا وحش

حل الملحن عمرو مصطفى، ضيفًا في ندوة فنّية بموقع "وشوشة"، بحضور رئيس التحرير الكاتب الصحفى عمرو صحصاح، وتحدث عن مشروعه الفني الجديد الذي أعلن عن تفاصيله، وتكمن في إعادة تقديم أغنياته القديمة كلها بعد انتهاء حقوق ملكيتها.

وقال عمرو مصطفى خلال ندوته في "وشوشة": " في 7 مطربين هيغنوا الأغنية الواحدة اللي قدمتها بصوتي، وطبعا المطربين دول من الجيل الجديد اللي هطلعه وهختار المطربين اللي عندهم 20 سنة أو أكتر وأي حد معداش 30 سنة هعمله أغاني.

وأضاف: "الصناعة باظت لما الحقوق اتاخدت وقفلوا على الملحن والمطرب والمؤلف، مفروض حاجتهم تنتشر، وأنا من حقي أبطل جميع التنازلات بتاعتي لأن الديجتال مكنش طلع وقت التنازلات وممكن ألجأ للمحكمة الاقتصادية أقولهم عيدوا التعاقد تاني لكن عاوز ألغي ال 25 سنة اللي فاتت كلها.

وأردف: سيبوا عمرو مصطفى في حاله وابعدوا عنه هو مش بتاع مشاكل ولا تجيبوا اسمه لا بحلو ولا بوحش خلاص كدة.

وسبق فاجأ الفنان عمرو مصطفى، متابعيه بالإعلان عن تسجيله للقرآن الكريم بصوته، كصدقة جارية له، إلى جانب إعادة تقديمه جميع الأعمال التي قدمها منذ عام 1999 بصوته بعد انتهاء مدة حقوق ملكيتها.

عمرو مصطفى، قال إنه يسجل القرآن الكريم بصوته خلال الوقت الحالي، وذلك ردًا على أحد متابعيه والذي طالبه بتسجيل القرآن بصوته كصدقة جارية، قائلا: بسجله الآن الحمدلله.

وسبق وكشف عمرو مصطفى، عن نيته لإعادة تقديم أعماله بصوته مرة أخرى بعد انتهاء حقوق ملكيتها، حيث كتب عبر حسابه بموقع فيسبوك تفاصيل قراره.

وقال: الأغاني اللي عملتها هترجع تاني بصوتي بعد انتهاء مدة حقوقها، فيه أغاني عملتها من سنة 1999، يعني فاضل حوالي عشرين سنة وترجع الحقوق تاني ليا.

وأضاف: ووصيتي لأولادي عدم التجديد لأي شخص، هنبتدي ننزلها من دلوقتي بصوتي، لكن بالكلام متغير وتوزيع جديد تمامًا، الأغاني دي هتفضل موجودة بصوتي طول العمر، وأي نسخة بصوت أي مطرب غناها قبل كده هتتمسح تمامًا بعد انتهاء المدة القانونية لها.

وأردف عمرو مصطفى خلال منشوره: هنفتح المجال للشباب الجديد إنهم يكتبوا على الألحان دي كلمات جديدة، خلال الخمس أو ست سنين الجايين.

واختتم: هكون محضر كل الأغاني اللي عملتها بصوتي مع كتابات شبابية جديدة، ونصيحة للمبدعين أي تصريح لا يزيد عن خمس سنوات.