عمرو مصطفى لـ"وشوشة": اتهموني بالغرور ولقحوا عليا زي الستات.. وهما أقل من الصفر ومش على الخريطة أصلًا

حل الملحن عمرو مصطفى، ضيفًا في ندوة فنّية بموقع "وشوشة"، بحضور رئيس التحرير الكاتب الصحفى عمرو صحصاح، ورد خلالها على من يتهمه بالغرور وعدم التواضع.

وقال عمرو مصطفى خلال ندوته في "وشوشة": الـ 25 سنة بتوعي في الوسط الفني، انتهت بمشاكلها وكل حاجة وبشكر اللي اشتغلت معاهم وهيتبقى معايا موزع واحد بس وكل اللي جاي هيكون جديد واللي يقارن نفسه بيا لازم يكون عمل نفس نجاحاتي وعدد أغنياتي الوطنية واتعامل مع كبار النجوم العالميين، لو عمل كدة يبقى يقارن نفسه بيا ويحط اسمه جمبي.

وأضاف: يطلعوا يقولك عمرو مصطفى غيران، غيران من مين يا ابني أنتوا مش على الخريطة أصلا صفر وأقل من صفر، لكن القصة كلها لما يكون مطرب كبير ومش عاوزني راس براس معاه، فيجيب شوية عيال ويقولهم انكشوه، عشان المنافسة تبعد عنه ولكن أنا مبلتفتش لحشرات لأن عمرو مصطفى مش ضعيف.

وأردف عمرو مصطفى: "أنا متواضع وبتفاعل مع الجمهور وعمري ماعملت تمويل لأغنية ليا وبرد على الناس إنستجرام وفيسبوك، وطلعوا عليا مغرور ومنفسن وبيلقحوا عليا زي الستات.

وتابع: مصر قوى ناعمة ولازم نطلع الموسيقى تاني، طلعوا ناس جديدة وجيل جديدة وكفاية بقي نظام الشللية ومحدش يجيب اسمي وسيرتي أنا خرجت برة المنافسة وهطلعلكم بالجيل الجديد.

وسبق فاجأ الفنان عمرو مصطفى، متابعيه بالإعلان عن تسجيله للقرآن الكريم بصوته، كصدقة جارية له، إلى جانب إعادة تقديمه جميع الأعمال التي قدمها منذ عام 1999 بصوته بعد انتهاء مدة حقوق ملكيتها.

عمرو مصطفى، قال إنه يسجل القرآن الكريم بصوته خلال الوقت الحالي، وذلك ردًا على أحد متابعيه والذي طالبه بتسجيل القرآن بصوته كصدقة جارية، قائلا: بسجله الآن الحمدلله.

وسبق وكشف عمرو مصطفى، عن نيته لإعادة تقديم أعماله بصوته مرة أخرى بعد انتهاء حقوق ملكيتها، حيث كتب عبر حسابه بموقع فيسبوك تفاصيل قراره.

وقال: الأغاني اللي عملتها هترجع تاني بصوتي بعد انتهاء مدة حقوقها، فيه أغاني عملتها من سنة 1999، يعني فاضل حوالي عشرين سنة وترجع الحقوق تاني ليا.

وأضاف: ووصيتي لأولادي عدم التجديد لأي شخص، هنبتدي ننزلها من دلوقتي بصوتي، لكن بالكلام متغير وتوزيع جديد تمامًا، الأغاني دي هتفضل موجودة بصوتي طول العمر، وأي نسخة بصوت أي مطرب غناها قبل كده هتتمسح تمامًا بعد انتهاء المدة القانونية لها.

وأردف عمرو مصطفى خلال منشوره: هنفتح المجال للشباب الجديد إنهم يكتبوا على الألحان دي كلمات جديدة، خلال الخمس أو ست سنين الجايين.

واختتم: هكون محضر كل الأغاني اللي عملتها بصوتي مع كتابات شبابية جديدة، ونصيحة للمبدعين أي تصريح لا يزيد عن خمس سنوات.