جميلة عوض لـ"وشوشة": فيلم ريد فلاج تجربة مختلفة

تواصل الفنانة جميلة عوض حضورها السينمائي من خلال فيلم ريد فلاج، الذي تخوض بطولته إلى جانب الفنان أحمد حاتم، في تجربة تتناول العلاقات العاطفية وما يحيط بها من مشاعر الغيرة والشك والتناقضات الإنسانية، إلى جانب تقديم شخصيات تحمل تفاصيل مختلفة عن الأعمال السابقة.

وتحدثت جميلة عوض في تصريح خاص لـ"وشوشة"، عن تفاصيل تجربتها في فيلم ريد فلاج، كاشفة عن أكثر ما جذبها إلى الشخصية التي تقدمها، قائلة: "أكتر حاجة شدتني للشخصية من أول قراءة إن فيها تفاصيل إنسانية حقيقية، ومش شخصية مثالية أو واضحة من أول لحظة. فيها مشاعر وتناقضات ومواقف ممكن أي حد يقابلها في العلاقات، وده اللي خلاني متحمسة أقدمها هي مختلفة عني في حاجات كثيرة، وده أصلًا من أكتر الحاجات اللي بحبها في التمثيل، إني أدخل شخصية مش شبه شخصيتي وأحاول أفهمها وأعيشها".

وعن عودتها للتعاون مع أحمد حاتم بعد فيلم عروستي، أوضحت: "التعاون مع أحمد حاتم مريح جدًا، وإحنا اشتغلنا مع بعض قبل كده وعارفين طريقة بعض في الشغل، وده بيخلي فيه كيمياء وتفاهم قدام الكاميرا لكن في ريد فلاج العلاقة والشخصيات مختلفة تمامًا، فكان مهم بالنسبة لنا مانعتمدش فقط على نجاح التجربة السابقة، لكن نقدم علاقة جديدة لها شكلها وروحها الخاصة. وأكيد مبسوطة إن الجمهور لسه فاكر ثنائي “عروستي” وبيتفاعل معانا".

وعن فكرة الفيلم التي تدور حول العلاقات والغيرة والشك، قالت:"الحب أحيانًا ممكن يخلي الإنسان يتغاضى عن حاجات واضحة قدامه، خصوصًا لما يكون متعلق بالطرف الثاني أو شايف إن العلاقة تستحق فرصة لكن في رأيي مهم جدًا إن الإنسان مايخسرش نفسه وسط العلاقة، ولا يتجاهل الإشارات اللي ممكن تكون مؤذية له. الفيلم بيطرح الفكرة من خلال شخصيات ومواقف، وكل مشاهد ممكن يشوف نفسه أو حد يعرفه فيها".

وعن أصعب مشاهد الفيلم، كشفت: "كان فيه مشاهد محتاجة تركيز كبير لأنها معتمدة على المشاعر وردود الأفعال أكثر من الكلام، وده أحيانًا بيكون أصعب من المشاهد اللي فيها حوار طويل كنت بحاول أوصل الإحساس بشكل صادق ومن غير مبالغة، وفي بعض المشاهد احتجت أركز في التفاصيل النفسية للشخصية قبل التصوير علشان أكون جاهزة للحظة".

وعن تأجيل الفيلم واستكمال التصوير بعد فترة، أوضحت: "التأجيل طبعًا بيكون شيء مش سهل، لأنك بتكون دخلت بالفعل في حالة الشخصية وبعدها بتبعد عنها فترة، لكن في نفس الوقت حاولت أحافظ على ارتباطي بالشخصية وأرجع لنفس الحالة بمجرد استئناف التصوير. والأهم إننا في النهاية نكون قدمنا الفيلم بالشكل اللي كنا متمنينه".

وعن أكثر رد فعل فاجأها بعد طرح ريد فلاج، قالت جميلة عوض: "أكتر حاجة أسعدتني إن الناس بدأت تتناقش في الشخصية نفسها وفي تصرفاتها، مش بس تتفرج على الفيلم وتنساه. لما شخصية تخلي الجمهور يسأل: هل هي صح؟ هل كانت المفروض تعمل كده؟ وهل الحب ممكن يخلينا نتجاهل حاجات واضحة؟ بالنسبة لي ده معناه إن الشخصية وصلت للناس وخلتهم يتفاعلوا معاها".

أبطال فيلم ريد فلاج

ويشارك في بطولة الفيلم أحمد حاتم، وجميلة عوض، ونسرين أمين، وشريف منير، وانتصار، وسيف زهران، والعمل من فكرة كيرو أمين، وتأليف أحمد محيي، وإخراج محمود كريم، وتدور أحداثه في إطار اجتماعي خفيف ممزوج بالكوميديا.