محمود الليثي لـ«وشوشة»: الفن الشعبي صعب.. وأتعاون مع حمزة نمرة

كشف الفنان محمود الليثي، في تصريح خاص لـ«وشوشة»، عن حرصه الدائم على تقديم أعمال غنائية مختلفة، مؤكدا أن نجاحه يعود إلى حب الجمهور ودعمه المستمر له، مشيرا إلى أنه لا يخشى خوض تجارب جديدة سواء على المستوى الغنائي أو التمثيلي.

وقال محمود الليثي: «أنا عايز أعمل دايما حاجة مختلفة، وإحنا عندنا دايما سابقين إن إحنا نبقى مختلفين. الفن الشعبي يا جماعة مش مقتصر على إن أنا راجل أقدم لون معين بس، لأ، الفن الشعبي صعب جدا، وغناء تقيل جدا، وفكر جامد جدا، ولازم يبقى متشعب، زي ما الأستاذ حكيم بعت وجاب جيمس براون، اللي هو أساسا مايكل جاكسون كان بيعشقه، وعمل معاه دويتو وكان موصلنا للعالمية».

وأضاف: «أنا من ضمن المطورين، فجبت موح ميلانو من برا، من الجزائر، وقلت له عايزين نعمل غنوة جزائري مصري كده، زي ما الشاب خالد عمل مع الفنان عمرو دياب».

وتابع: «إحنا دلوقتي لو عملنا مع موح ميلانو، وعملنا في الكليب اللي بعديه مع الأستاذ حمزة نمرة بإذن الله، إحنا إن شاء الله متجهين لأوروبا بقى مع دريك وكاتي بيري وبيونسيه وكده إن شاء الله».

وعن علاقته بالجمهور، أوضح محمود الليثي: «الجمهور العظيم الـ130 مليون اللي بيعشقوا محمود الليثي، هم اللي نجحوني. نجاحي بيهم، فأنا بناء عليه بتعامل على الحب اللي هم بيحبوني بيه، ولو هم ما بيحبونيش أنا أرجع ورا أشوف إيه الغلط اللي عندي وأصلحه، والمطربين المشاهير برا مصر ما يعرفوش المطربين شكل، هما عارفين غنوة ناجحة وما يعرفوش مين اللي بيغنيها».

وأكد أنه لا يضع حدودا أمام نفسه عند خوض التجارب الجديدة، قائلا: «أنا ما عنديش أي صعوبة في التجربة، وما بخافش من حاجة، أنا ما بخافش غير من ربنا».

وعن مفهومه للنجاح، قال محمود الليثي: «النجاح الحقيقي اللي أعرفه إن الناس تسمع الغنوة وتشغلها، وبعرفه من الشارع مش السوشيال ميديا».

وعن الفنانة شيرين عبد الوهاب، أشار إلى أنها قد تغيب عن الجمهور لفترة من أجل التحضير لأعمال جديدة، قائلا إنها تحضر دائما لحاجات حلوة، مستشهدا بأغنيتي «بتاعتها» و«بحرية»، واللتين حققتا مشاهدات تجاوزت 200 مليون مشاهدة على يوتيوب، مؤكدا أن حب الجمهور لها أحد أسباب استمرار نجاحها.

كما كشف محمود الليثي عن خوضه تجربة السينما خلال الفترة المقبلة، قائلا: «فيلم عروسة من الصين مع أحمد السبكي، وكليب مع الفنان حمزة نمرة».