فرح الموجي لـ"وشوشة": أتمنى أن تكون أغنيتي الجديدة جزءًا من كل الأفراح القادمة

كشفت الفنانة فرح الموجي في تصريح خاص لـ"وشوشة"، عن سعادتها بطرح أحدث أغانيها، مؤكدة أنها تمثل ثاني أعمالها الغنائية بعد أغنية مالي عيني، التي حققت نجاحًا كبيرًا منذ طرحها.

وقالت فرح الموجي: الحمد لله، الأغنية لسه نازلة قريب ومبقالهاش كتير، وهي تاني أغنية ليا بعد مالي عيني، وبحبها أوي طبعًا، وموضوع الأغنية حلو وجميل، إن اتنين يبقوا بيغنوا لبعض في بداية حياتهم مع بعض، فأنا بحبها، وبتمنى إن شاء الله إنها تبقى جزء في كل الأفراح اللي جاية.

فرح الموجي: مالي عيني ليها مكانة خاصة عندي

وأضافت فرح الموجي قائلة: أنا عملت أغنيتين، وبالنسبالي الاتنين بحبهم، بس مالي عيني طبعًا هتفضل ليها مكانة خاصة، عشان هي أول أغنية نزلت، والحمد لله عجبت ناس كتير أوي ونجحت نجاح حلو أوي.

وتابعت فرح الموجي حديثها قائلة:"أنا من غير ما أعمل مجهود هي جايبة مليون مشاهدة على اليوتيوب، وعلى التيك توك طول الوقت بشوفها، فالحمد لله إنها نجحت، وهتفضل بالنسبالي ليها مكانة خاصة كده".

فرح الموجي: انتمائي لعيلتي مش عائق أمام اختياراتي

وعن تأثير انتمائها لعائلة فنية على اختياراتها، أوضحت:مش مقارنة، بس يمكن الموضوع بيتحط في حتة إن الاختيارات اللي أنا بقدمها إيه، والشكل اللي بقدمه إيه، عشان العيلة اللي أنا فيها.

وأردفت: أنا قولت قبل كده وبقول تاني، ممكن يكون في نوع من أنواع الضغط بسبب الموضوع ده، بس هو مش بيأثر عليّ، لأني سواء كنت في العيلة دي أو مش فيها، كنت بشخصيتي هبقى مركزة في اختياراتي برضه.

واختتمت فرح الموجي حديثها قائلة: "الموضوع مش محسسني بعائق، بالعكس هو مفيد بالنسبالي من الناحية الفنية".