أنوشكا لـ"وشوشة": عادل إمام مدرسة في التواضع قبل التمثيل
يحل اليوم عيد ميلاد الزعيم عادل إمام الـ86، وسط حالة كبيرة من الحب والتقدير التي يحظى بها من جمهوره ونجوم الوسط الفني في مصر والوطن العربي، باعتباره واحدًا من أهم رموز الفن العربي وصاحب مسيرة فنية استثنائية امتدت لعقود من النجاح والتأثير في السينما والمسرح والدراما.
وفي هذه المناسبة، حرصت الفنانة أنوشكا على توجيه رسالة مطولة للزعيم، استعادت خلالها كواليس عملها معه، مؤكدة أنه يتمتع بتواضع كبير وحضور إنساني مميز داخل موقع التصوير، إلى جانب كونه أحد أهم الداعمين للجيل الفني.
وقالت أنوشكا في تصريح خاص لـ”وشوشة”:"أنا اشتغلت مع الزعيم في مسلسل ناجي عطا الله، وكان شافني قبلها في مسلسل قابله في رمضان في مسلسل قانون المراغي وهو اللي اختارني عشان أشارك معاه ومع المجموعة في مسلسل ناجي عطا الله في رمضان اللي بعده مباشرة".
وأضافت الفنانة أنوشكا : “هفضل أقول كل سنة وانت طيب يا زعيمنا يا كبيرنا يا بهجتنا، هو فعلًا بهجتنا، وعايزة أقول إننا وإحنا بنصور رغم إنه الكبير لكنه كان أبسط واحد وسطينا، ودايما أقول إن الكبير مش مجرد نجومية شباك أو اسم تجاري، لكن الكبير بمحبة الناس واحترامه لغيره وهو بالنسبة لي مثل أعلى بنتعلم منه".
وتابعت الفنانة أنوشكا : “اتعلمت منه إن كل ما الإنسان يكبر في المهنة لازم يزيد تواضعه، والزمن بيأكد إن الأستاذ عادل إمام رغم حجمه الكبير جدًا، هو شخص متواضع لدرجة كبيرة جدًا مع كل اللي حواليه، طالما مفيش تجاوز أو فرض نفس في وقت الشغل".
واختتمت حديثها قائلة: “كنت بستمتع جدًا بقعدتي معاه، لأنه كان دايمًا يحكي لنا حكايات ومواقف، ويدينا نصايح نقرأ بيها ما بين السطور، وكان بيبقى فيه دفء وأبوة في كلامه، يارب ما يحرمنا منك يا زعيم، ودايمًا تفضل بهجتنا".
