نائب شعبة الخضروات ينفي تصريح “اللي مش عاجبه البطيخ ياكل موز”: “الكلام ده مقولتوش"
نفى الدكتور حاتم النجيب، نائب رئيس شعبة الخضروات والفاكهة بالغرفة التجارية، ما تم تداوله بشأن تصريحه المثير للجدل حول أسعار البطيخ، مؤكدًا أن هذه الكلمات لم تصدر عنه، وذلك خلال مداخلة هاتفية ببرنامج كلام الناس المذاع عبر قناة MBC مصر مع الإعلامية ياسمين عز.
نفي التصريح المتداول
قال حاتم النجيب: «تصريح اللي مش عاجبه سعر البطيخ يجيب موز أو كنتالوب ده مش حقيقي ومخرجش عن لساني ولا يمت لينا بصلة، أنا قلت إن في تحركات لبعض المنتجات علشان تتراجع أسعارها خلال أسابيع».
وأضاف: «الحمد لله بقى لنا أربع أيام في تراجع مستمر نتيجة زيادة المعروض في الأسواق».
أسباب ارتفاع الأسعار
وأوضح: «إحنا متابعين مع رئيس الوزراء، فعلًا في حاجات انخفضت زي الطماطم، وبنأكد لكل أهالينا اللي عايز ياكل أي منتج براحته، لكن عندنا توقيتات للزراعة، وفي بعض عوامل جوية ممكن تأثر على المحاصيل».
وتابع: «قلت كمان إن تكلفة الإنتاج زادت بسبب الأحداث العالمية، لكن ما قلتش اللي مش عاجبه البطيخ ياكل الموز، والكلام ده خطأ».
طمأنة المواطنين بانخفاض الأسعار
واستكمل: «إحنا بنطلع للناس نصارحها ونطمنها ونقول الحقيقة، وإن عندنا مواسم وده طبيعي على أرض الواقع، لكن ما قلناش اللي مش عاجبه ياكل أو ما ياكلش».
بشائر بانخفاضات قادمة
واختتم حديثه قائلًا: «عايزين نبشر الناس، الخوخ انخفض، والبطيخ انخفض، والكنتالوب في متناول كل مواطن مصري، والبطيخ من 75 لـ120 جنيه، وفي أسواق التجزئة من 100 لـ150، وهينخفض أكتر مع زيادة المعروض».
وأضاف: «كمان ورق العنب والبامية والملوخية والبطاطس والبصل كلها فيها انخفاض، وده هيظهر في الأسواق خلال الفترة الجاية».
