“حصان أحمر وبطيخ في المنام.. ياسمين عز تشعل الجدل بتوقع فوز الأهلي !”
كشفت الإعلامية ياسمين عز عن رؤيا غريبة ربطتها بفوز النادي الأهلي، وذلك خلال حلقة من برنامج كلام الناس المذاع عبر قناة MBC مصر.
قالت ياسمين عز: «حلمت خير اللهم اجعله خير، الأهلي كان لابس أحمر في أحمر وراكب حصان أحمر في أحمر ماشي وسط زرع أخضر في أخضر، ولقى قدامه شجرة أبيض في أبيض أغصانها بيضاء تجنن، نازل منها غصنين على كل غصن بطيخة، راح خطفهم وجري»، مضيفة: «إن صدقت رؤياي يبقى الأهلي هيكسب 2-0».
إشادة بالأداء ولاعبي الفريق
أشادت ياسمين عز بمستوى لاعبي الأهلي، قائلة: «لاعيبة الأهلي يا جماعة إيه الحلاوة دي والشطارة دي والأداء العالمي اللي مشفتش قبله ولا بعده ولا هنشوف ده ولا في كريستيانو رونالدو وأصحابه».
تعليقها على إمام عاشور وزيزو
كما علّقت على أداء اللاعب إمام عاشور، قائلة: «إمام عاشور كان مموت نفسه وقلبه على الفرقة، من كتر الحماس كان هيطق له عرق بعد الشر عليه وعلى اللي حواليه، ولا كان بيتدلع ولا أي حاجة، أنا اللي بتدلع».
وتطرقت أيضًا إلى اللاعب أحمد سيد زيزو، مضيفة: «ولا زيزو مين يقدر يتكلم عليه، ده ظابط نفسه على الشعرة، يعرف إمتى يشوط الكورة وإمتى يسرح شعره، في الدقيقة 30 يشوط الكورة، والدقيقة 31 يسرح شعره، و32 يعدل التيشيرت، ده الواجهة بتاعتنا».
واختتمت حديثها بالإشارة إلى موقف الحارس مصطفى شوبير، قائلة: «مصطفى شوبير واقع وكله ملموم، ووسط كل الأجواء دي زيزو بيعدل شعره يمين وشمال عشان يخفف من حدة الموقف، مش كل حاجة تاخدها بالسلب، لازم نخطف الكاميرا عشان ما نفضحش قدام الناس».
