داليا مصطفى لـ"وشوشة": لازم البنات تحب نفسها وتحس بقيمتها لتحقيق النجاح
تحدثت الفنانة داليا مصطفى عن نصيحتها المهمة لكل فتاة حول حب النفس والعيش من أجل الهدف، مؤكدة أن تقدير الذات يلعب دورًا أساسيًا في العلاقات وفي تحقيق الطموحات الشخصية.
وفي تصريح خاص لـ"وشوشة"، قالت داليا مصطفى: "لازم كل بنت تحب نفسها بجد، لأن اللي بيحب نفسه بيحس بقيمة نفسه لما تحسي بقيمتك، الطرف التاني هيحس بشكل طبيعي إنك مختلفة ومميزة، وهيبدأ يتقرب أكتر ويحس أنك نجمة بعيدة في السما، حب النفس ده بيخلي الشخص مشرق ومبسوط وسعيد، ومش فارق معاه أي حد في الدنيا غير إنه يحقق سعادته الشخصية".
وأضافت: "في حاجة مهمة جدًا أنا عايشتها الفترة الأخيرة، خصوصًا في بداية السنة قررت أعيش لهدف واضح، وهو أنا نجمة ممثلة شاطرة، وده خلا حياتي كلها تتركز على تحقيق الهدف ده لما تعيشي حلمك جوه نفسك، وتعيشي الحاضر على إنه بداية تحقيق حلمك، بتلاقيه بيتحقق خطوة خطوة فعلا مفيش حاجة اسمها الماضي أو المستقبل، كله الحاضر اللي عايشة فيه دلوقتي، والحاضر ده هو اللي هيصنع مستقبلك".
واستكملت داليا حديثها عن تجربتها في مسلسل "روج أسود" قائلة: "الشغل على المسلسل ده كان من أصعب وأقوى التجارب اللي عشتها خلال آخر شهر ونصف كل المشاهد اللي اتصورت كانت صعبة جدًا ومؤلمة، لكن وأنا بشتغل كنت عايشة الهدف إن الناس هتحب العمل وهيشوفوا مجهودي وده كان الدافع الأساسي واللي خلاني أركز وأدي أفضل أداء ممكن".
