لقاء الخميسي: حسيت إني مش كفاية.. وأهلي وولادي كانوا ضهري
كشفت الفنانة لقاء الخميسي تفاصيل أزمتها الأخيرة، خلال استضافتها في برنامج «أسرار» مع الإعلامية أميرة بدر، حيث تحدثت بصيغة مباشرة عن مشاعرها بعد أزمة زواج طليقها حارس المرمى محمد عبد المنصف من الفنانة إيمان الزيدي قبل إعلان انفصالهما.
الوجع كان جوايا أنا
وقالت لقاء: “الإحساس اللي بيجي للست لما تعرف إن جوزها اتجوز عليها صعب جدًا… أنا حسّيت إني مش كفاية، وده هزني من جوا قعدت أراجع نفسي وأسأل هو أنا عملت إيه غلط؟ قصرت في إيه؟ وفضلت ألوم نفسي فترة ”.
وأضافت: “أنا أصلًا كنت بقالي 3 سنين بعيدة عن الشغل، ومركزة في بيتي وولادي، ومكنتش مأثرة في حاجة هو مكنش بيبات بره البيت، ومكنش ظاهر عليه أي تغيير، عشان كده عمري ما حسّيت إن في حاجة مستخبية.”
مكنتش بدور… بس اللي جاي هدور
وأوضحت لقاء أنها لم تكن من النوع الذي يفتش أو يراقب، قائلة: “أنا بطبعي مكنتش بدوّر وراه، كنت واثقة ومطمئنة. لكن التجربة دي خلتني أقول لنفسي لأ… اللي جاي هدور أكتر وأبقى واخدة بالي ”.
وأكدت أن زوجها أخبرها وقتها بسبب زواجه، لكنها أشارت إلى أن هذا السبب كان يمكن التعامل معه، مضيفة: “السبب اللي قاله كان ليه حلول، وكان ممكن نقعد ونتكلم ونلاقي مخرج، بس هو مقالش في وقتها ”.
السوشيال ميديا ضحكتني رغم الوجع
وعن تفاعل الجمهور، قالت: “أكتر حاجة ضحكتني تعليقات الستات على السوشيال ميديا لما قالوا خلاص هنروح نعمل قيد عائلي بقى! الضحك ده هوّن عليا شوية، وحسسني إن الناس حواليا.”
وأكدت أن دعم الجمهور كان له أثر نفسي كبير، خاصة في لحظات الضعف الأولى.
أهلي وولادي كانوا سندي
واختتمت لقاء حديثها قائلة: “اللي وقف جنبي بجد أهلي وأصحابي القريبين مني، وولادي كانوا ضهري… وقفوا في صفي وظبطوني نفسيًا وجودهم هو اللي عدّاني المرحلة دي ”.
وأضافت أن التجربة رغم قسوتها علمتها الكثير عن نفسها وعن قوة التحمل، مؤكدة أن أصعب اللحظات أحيانًا تكون بداية لاكتشاف قوة لم تكن تعلم بوجودها داخلها.
