شذى تطمئن جمهورها بعد الجدل حول طلاقها: "أنا بخير ومش هتكلم عن التفاصيل"
طمأنت المطربة شذى جمهورها على حالتها الصحية والنفسية، عقب انتشار أخبار تفيد بأنها ليست على ما يرام بعد طلاقها.
وخلال السطور التالية، ينقل لكم موقع “وشوشة” أبرز تصريحاتها خلال استضافتها في برنامج "لمن يهمه الفن" مع الإعلامية أميرة نور، المذاع عبر إذاعة “نغم إف إم”.
جدل واسع حول خطوبة وزواج ثم انفصال سريع
خلال الفترة الماضية، انتشرت أخبار كثيرة حول خطوبة الفنانة شذى، ثم زواجها بشكل سريع للغاية، ثم الانفصال، ما أثار حالة من الجدل والقلق لدى جمهورها على منصات التواصل الاجتماعي.
وخلال هذه الاستضافة، أوضحت المطربة شذى أنها الآن على ما يرام، ولا تعاني من أي ضغوط نفسية كما يشاع على مواقع التواصل الإجتماعي.
شذى تنفي حديثها عن تفاصيل الطلاق
ونفت شذى ما يقال عن أنها تحدثت عن تفاصيل طلاقها، قائلة: "أنا بشوف كلام منتشر على السوشيال ميديا إني حكيت تفاصيل، لكن في الحقيقة أنا ما قلتش أي حاجة من اللي بتتقال على السوشيال ميديا دي نهائي".
"اللي في بيتنا ما يطلعش بره"
وأضافت: "أنا مش بتكلم، واللي حصل حصل خلاص، وأنا مش من المدرسة بتاعة إني أتكلم في حق حد أو في حاجة خلصت، لأن أنا بنت ناس، واتعلمت إن اللي في بيتنا ما يطلعش بره".
وتابعت: "ممكن أقول إني ما اتبسطتش في التجربة وتسرعت، لكن مش هتكلم عن التفاصيل أو عن الطرف الآخر، وأنا مش هتكلم عن الوحش، ويا ستي حتى لو أنا السيئة في رواية حد، ما عنديش أي مشكلة، لكن مش هتكلم عن تفاصيل".
حقيقة ارتباط الطلاق بالماديات
وأوضحت شذى حقيقة ما تردد عن ارتباط الانفصال بالماديات، قائلة: "في ناس بتقول إن الموضوع ليه علاقة بالماديات، لكن لا خالص أبدًا مش ده السبب، أنت ساعات إنتِ بتكوني راسمة في خيالك حياة، لكن الواقع بيطلع مش شبهها خالص".
وأضافت: "ممكن تكوني شايفة إن الشخص اللي قدامك ده بيدعمك في شغلك، وبيفرح لفرحك وبيزعل لزعلك، وأبسط حاجة مثلًا نوع الأكل، كنا بنقول إننا بنحبه إحنا الاتنين، وبعد كتب الكتاب ما بقيناش بنحبه إحنا الاتنين زي بعض، وده عادي لأن ساعات بنرسم حاجات في خيالنا ما بتكونش حقيقية".
الفنان إنسان قبل أي شيء
واختتمت الفنانة شذى حديثها قائلة: "ناس كتير جدًا بتشوف إن الفنانين بيبصوا للماديات، لكن لا، أي فنان في الأول وفي الآخر إنسان، عايز أمان، وعايز احتواء، وعايز دعم وراحة".