أحمد فتحي يكشف لـ"وشوشة" شخصيته في فيلم "مؤلف ومخرج وحرامي"
كشف الفنان أحمد فتحي عن أسباب حماسه للمشاركة في فيلم “مؤلف ومخرج وحرامي”، متحدثًا عن تفاصيل الشخصية التي يجسدها، وكواليس العمل، والرسائل التي يتمنى وصولها للجمهور، وذلك خلال تصريحات خاصة.
وعن ما جذبه للمشاركة في الفيلم منذ قراءة السيناريو، قال أحمد فتحي لـ"وشوشة": “اللي جذبني للفيلم فكرة الفيلم والسيناريو وطرح المؤلف اللي أنا بلعب دوره الغير متحقق والصعوبات اللي بيقابلها في حياته، دا عجبني”.
وبسؤاله عن تجسيده لشخصية سيناريست يحلم بالنجاح، ومدى تشابهها مع تجاربه الواقعية في الوسط الفني، أوضح قائلًا: “هي شبه شخصية السيناريست هي مضمون الحكاية مع حكاية الحقيقة إن أنت مهما تعبت ومهما فشلت وواجهت صعوبات بإصرارك وموهبتك اللي ربنا مدهالك بتوصل، ودا المفروض بنشوفه في الفيلم”.
وحول ظهوره بشكل مختلف تمامًا عن أدواره السابقة، أكد أحمد فتحي حرصه الدائم على التجديد، قائلًا: “كل مرة بحاول اختلف فيها عن المرة اللي قبل كدا، وأنا دلوقتي مش هقدر أقول وجه الاختلاف، الجمهور هو اللي هيقول لما يشوف الفيلم هل أحمد اتغير، دي ترجع للجمهور والنقاد”.
وعن الصعوبات التي واجهته في تجسيد شخصية " بلبل" نفسيًا وإنسانيًا، قال: “شخصية بلبل مش هقول صعوبات، بس الواحد بيبذل مجهود في صنع الشخصيات، وكان نفسي يبقى إنساني أكتر من لحم ودم أكتر، حاولت إن أنا أشتغل على دا المرة دي”.
كما تحدث عن كواليس العمل مع فريق الفيلم، مؤكدًا أنها كانت إيجابية رغم الإجهاد، حيث قال:“كواليس العمل برغم إن العمل متعب ومرهق، ولكن دايمًا بعمل الحاجة اللي بحبها بكون مبسوط، ودي تاني مرة نتعاون أنا وعصام عمر، وكام مرة أنا ومي كساب، إحنا بينا علاقة إنسانية لطيفة دا كان بينعكس على التعب، والكواليس كانت كويسة جدًا”.
وعن الرسالة التي يتمنى أن يخرج بها المشاهد بعد مشاهدة الفيلم، أوضح: “أحب يخرج بيه المشاهد، أنا قولته في الفيلم، كل واحد بيقرا الفيلم زي ما هو عايز وياخد منه اللي عايزه واللي قريب من قلبه”.
وبالتزامن مع انتظار عرض مسلسل "اللعبة 5" تحدث أحمد فتحي عن كيفية التوفيق بين السينما والدراما التلفزيونية، قائلًا: “مع ذكر اللعبة كنت مخلص الفيلم دا قبل ما نبدأ تصوير اللعبة الجزء الخامس، ولكن الحاجات المتشابهة الموضوع بيبقى صعب شوية، بس واخدين عليه بنحاول نفصل بين الشخصيات والأعمال”.