"ربنا بيسامح".. خالد الصاوي يكشف عن رحلته من الإلحاد للإيمان

تحدث الفنان خالد الصاوي، عن فترة من حياته كان فيها ملحدًا، وعن نوبات الاكتئاب التى كان يعاني منها، موضحا كيف انتقل بعدها إلى الإيمان بالله.

خالد الصاوي يواجه الاكتئاب الذاتي

قال الصاوي من خلال لقاء تفزيوني في برنامج كلمة أخيرة مع الإعلامي أحمد سالم، المذاع على قناة ON، عن نوبات الاكتئاب التي كان يعانيها: "أحيانًا بدخل في نوبات اكتئاب عميق، وده عادة بيكون أنا السبب فيها، لأن توقعاتي وطموحاتي أكبر بكثير من بعض الأعمال المتدنية اللي بعملها أحيانًا المراية تكشف نفسي".

خالد الصاوي يتحدث عن الإلحاد والماضي المظلم

وتطرق إلى تصريحه السابق حول الإلحاد، مضيفًا:"كنت ملحد، أه طبعا، أنا هكذب؟! وقلت إني بعد كده آمنت، فلما تاخد كل ده عشان تبقى صحافة صفراء أو إعلام أصفر، ويبقى عاجبك البوقين دول وتجرى تقولهم يبقى أنت مش آمين".

كما أضاف:"كنت مجنون، كنت مدمن، عملت كل ده وبطلت كل ده، فأنت سايبلي كل اللي بقوله وكل محاولاتي، ربنا بيسامحني، وأنت جاي تعمل عليا شغل في مواقع التواصل الاجتماعي".

المسؤولية عن الفشل الشخصي

وأكد خالد الصاوي أنه دائمًا يتحمل مسؤولية فشله بنفسه، دون لوم الدولة أو الشعب أو الظروف:"لو مش ناجح فى حياتي أنا السبب، عمرى ما قولت الدولة أو الشعب أو الجهل ضدي، أنا لم اضطهد، أنا كنت معارض سنين، وماضهطدش"

الاعتماد على الله بدلًا من الهروب

وأشار إلى تغير طريقته في التعامل مع الاكتئاب مع مرور الوقت:"قديمًا لما كنت بدخل في نوبة اكتئاب، كنت بلجأ للحاجات اللي تساعدني أنسى، أما دلوقتي بلجأ لله عز وجل".

وختم خالد الصاوي حديثه بالحديث عن الفرص التي أتيحت له:"لو رجع بي الزمن مرة تانية، مش هفرط في الفرص اللي أتيحت لي، ومش هارتكب كل الأخطاء اللي ارتكبتها، وأتيحت لي فرص لم تُتاح لحد غيري، وكل الأخطاء اللي ارتكبتها كانت نهايتها الظلام"