بينهم بشرى ومي عز الدين.. فنانون يدعمون أحمد السقا بعد الهجوم عليه

دعم عدد كبير من نجوم الفن النجم أحمد السقا بعد الهجوم الذي واجهه، عقب نشره فيديو تحدث فيه عن محمد صلاح.
 

وخلال السطور التالية، يرصد لكم موقع وشوشة أبرز تصريحات الفنانين لبرنامج "ET بالعربي" حول هذا الموقف.

بشرى: السقا بيتكلم بقلبه وبيحب ينصر الحق

علقت النجمة بشرى قائلة:"أحمد السقا برج الحوت، وبيتعامل بمشاعره جدًا، خصوصًا إنه مدمن كورة، وهو جدع وبيحب ينصر الحق. 
ولما اتكلم عن محمد صلاح، كان لأن محمد صلاح فعلًا فخر لكل العرب.
هو حاول ينصره باللي يقدر عليه لأنه شايف إنه بيتعرض لظلم.
لكن بقى وجود قلة أدب وشتيمة وتنمر وسرعة في الهجوم، ده أصبح العادي على الجميع وبقى منتشر، وإحنا اتعودنا. وأنا عايزة أقول لأحمد السقا: ما تزعلش قوي كده، إحنا طول الوقت بيحصل فينا كده، إيه الجديد؟".

جومانا مراد: بالراحة على بعض والهجوم مش مبرر

كما قالت النجمة جومانا مراد:"أنا عايزة أوجه رسالة للناس وأقول لهم: بالراحة، بالراحة شوية علينا، وخلينا بالراحة على بعض، بلاش كل واحد يهاجم بالطريقة دي، وأكيد أحمد كانت نيته كويسة وسليمة، وعمل الفيديو ده من منطلق حبه، حبنا كلنا لمحمد صلاح، اللي بنفتخر بيه ودايمًا بنتمنى له الخير، فبلاش الانتقادات القوية والهجوم ده".

مي عز الدين: النقد مقبول لكن بدون قسوة

ومن جانبها، علقت النجمة مي عز الدين قائلة:"هو أحمد السقا بس اللي بيتعرض لهجوم؟ لا، دي بقت حاجة بتحصل كتير جدًا، والهجوم ده بقى كل يوم، الجمهور يقدر يقول نقد، لكن ما يكونش لازع كده. 
الزمن ده بقى فيه انتقال لكل حاجة، مع إن مش المفروض إن حد يحكم على حد، ولا أنا المفروض أقول لك تتصرفي في الموقف ده بالطريقة الفلانية، ده مش صح".

ليلى علوي: الهجوم لا يشبه الشعب المصري

كما أوضحت النجمة ليلى علوي أنها تعتقد أن هذه الانتقادات ليست من الشعب المصري الطيب، بل قد تكون من مصادر أخرى، قائلة:"أنا ما أعتقدش إن الشعب المصري الطيب، الحنين، الجميل، هو اللي بيعمل الهجوم ده".

محمد ثروت: أحمد السقا جبل لا يهتز

وفي الختام، أشار الفنان محمد ثروت إلى أن النجم أحمد السقا "علامة مميزة وجبل"، مؤكدًا أنه لا تهزه جميع هذه الانتقادات التي وجهت إليه.