حنان مطاوع تكشف "عقدة بنت المشاهير": معاناة صامتة يعيشها الأطفال

تحدثت الفنانة حنان مطاوع عن "عقدة بنت المشاهير"، التي تراها واحدة من أقسى الأمور التي يمكن أن يمر بها الأطفال.

وخلال السطور التالية ينقل لكم موقع "وشوشة" أبرز تصريحاتها خلال استضافتها في برنامج "ضيفي" مع الإعلامي معتز الدمرداش.

حديث حنان مطاوع عن قسوة لقب "بنت المشاهير"

قالت الفنانة حنان مطاوع إن أحد أصعب الأشياء التي تواجه الأطفال هو شعورهم بأن الناس لا يحبونهم لذواتهم، بل يحبونهم فقط لأنهم أبناء فنانين، وأضافت: "ده شيء قاسي جدًا على الأطفال… إنهم يحسوا إن الناس مش بتحبهم علشان هما مؤدبين أو أذكياء أو يستاهلوا… لا، بتحبهم علشان هما أولاد فنان أو فنانة معروفة."

كيف تربي ابنتها أماليا؟

وأوضحت قائلة:"أنا لما باجي أربي أماليا بنتي، بقول لها: إنت تتحبي علشان إنتِ مؤدّبة، وذكية، وجميلة، وتستحقي إنك تتحبي… تتحبي لذاتك، مش بقول لها إنت كويسة لأن باباكي كويس أو مامتك كويسة لأ، بقول لها: لأنك ذكية وتستحقي ده."
وأضافت أن هذا أمر مهم جدًا للأطفال، حتى يتعلموا حب أنفسهم دون شروط أو مقارنات.

تجارب مؤلمة عاشتها في طفولتها

وأشارت النجمة إلى أنّ الأمر كان قاسيًا عليها أيضًا في طفولتها، قائلة:"يبقى الطفل داخل مكان، والناس تسأله باستغراب: إيه ده… إنت  بنت سهير المرشدي؟ لأ… أنا مش موجودة أصلًا.
محدش يقول اسمي… محدش يقول إيه ده حنان؟ لأ… أنا محطوطة في دايرة إن أنا بنت حد مشهور.
وحش جدًا إن الإنسان يحس إن كل إنجازاته في الدنيا إنه ابن فلان."

وأضافت:"الموضوع ده كان عندي جدًا وأنا طفلة، وكل ما كنت أكبر كان الإحساس بيزيد.
كنت عايزة أحس إن الناس عارفاني لشخصي وإن صحابي بيحبوني لذاتي… إن حد يدخل حياتي يبقى عايز يقعد معايا علشان شخصيتي وصفاتي، مش علشان أي حاجة تانية."

محاولات لإثبات الذات قوبلت بالاتهامات

وتابعت:"ولما بدأت أحاول في المدرسة أبقى شاطرة عشان الناس يحبوني، كنت بسمع تعليقات زي طبعًا دي بنت الفنان كرم مطاوع… أكيد جايب لها الامتحان."

وأضافت:"ولما بقيت مؤدبة جدًا عشان آخد الطالبة المثالية، كان يتقال دي الطالبة المثالية؟ ما هو طبيعي مختارينها علشان بنت ممثلة."

أصعب ما عاشته في طفولتها

واختتمت النجمة حنان مطاوع حديثها مشيرة إلى أن هذه التجارب كانت من أقسى ما يمكن أن يعيشه طفل، مؤكدة أنها عاشتها بنفسها. وقالت:"في الوقت ده ما كنتش عارفة أروح فين… كل ما أعمل حاجة كان يتم تفسيرها إنها علشان أنا بنت فلان."