محمد علي رزق يكشف أسباب قسوة المهنة وحكايات صادمة من كواليس التصوير

تحدث الفنان الشاب محمد علي رزق عن مهنة التمثيل، مشيرًا إلى أنها مهنة قاسية جدًا.

وخلال السطور التالية ينقل لكم موقع "وشوشة" أبرز تصريحاته خلال استضافته في بودكاست "بوب كورنر" الذي تقدمه الفنانة هبة عبد الغني، والمذاع عبر موقع التواصل الاجتماعي يوتيوب.

قال محمد علي رزق إن مهنة التمثيل “قاسية وصعبة”، موضحًا:"إحنا لو بنصور مشهد، وحد تعب فجأة أو أغمى عليه وكان لازم يتنقل المستشفى، بيتنقل المستشفى… لكن التصوير مش بيقف. ولو وقف، أقصى حاجة بينتظرها التصوير ساعة… مش أكتر من كده.
المهنة دي ما بتنتظرش حد.”
وأكد أنها رغم ذلك مهنة رائعة وجميلة، وأنه يحبها كثيرًا، لكنها تبقى قاسية في تفاصيلها وضغوطها.

هبة عبد الغني تكشف موقفًا صعبًا أثناء التصوير

وفي سياق متصل، كشفت الفنانة هبة عبد الغني عن موقف وقع منذ يومين فقط، أثناء تصوير آخر مشاهدها في أحد المسلسلات مع الأستاذ يحيى إسماعيل.
وقالت:"كنت بصور آخر مشاهدي في أحد المسلسلات مع الأستاذ يحيى إسماعيل… وحقيقي الأستاذ يحيى إسماعيل شخص راقي ومحترم جدًا. المهم بعد ما عدى نص اليوم تقريبًا وعرفنا إن اليوم خلاص هيخلص، اكتشفنا إن الأستاذ يحيى وصله تليفون بإن حد قريب منه جدًا عمل حادثة… لكنه مش قادر يمشي ويسيب اللوكيشن، عشان في شغل وتصوير.”

وكانت هبة تشير بذلك إلى تأكيد ما قاله محمد علي رزق، بأن هذه المهنة لا تنتظر أحدًا، ولا تعطي فرصة للتوقف مهما كانت الظروف.

محمد علي رزق: ضغوط نفسية قاسية في لحظات إنسانية

وعلق محمد علي رزق على حديثها قائلاً:"دي ضغطة وحشة قوي… إن الإنسان يحس إنه مش قادر يوقف شغله علشان يطمن على حد من أهله… دي حاجة صعبة جدًا، من فترة كان يحيى ابني تعب، وكان لازم أنزل تصوير، وهو كان صغير جدًا، وكان بيقولي خليك معايا يا بابا… وهو مش مستوعب إن عندي شغل ولازم أنزل، وأنا كنت نازل وأنا مضغوط وتعبان… فِكرة إنك مش قادر تقعد جنب ابنك وهو عيان ومحتاجك… صعبة جدًا."

المهنة لا ترحم

واختتم الفنان محمد علي رزق حديثه قائلًا:"في لحظات ممكن يبقى أمك محتجاك، أو أبوك محتاجك، أو ابنك، أو حتى إنت نفسك مش قادر تعمل حاجة، بس طول الوقت بينتهي الأمر بإنك تخلص الشغل… وبعدين تشوف عايز تعمل إيه، وأنا بشوف إن دي أكتر حاجة قاسية في المهنة... بس بقيت متعايش مع ده".