شيكابالا ينتقد تصرف حسين الشحات: ملهاش لازمة تقول للاعب المنافس أنت قصير!
أثار النجم محمود عبد الرازق شيكابالا، قائد نادي الزمالك السابق، الجدل مجددًا بعد تصريحاته القوية التي وجهها إلى لاعب الأهلي حسين الشحات، منتقدًا تصرفه خلال مباراة القمة الأخيرة بين الأهلي والزمالك، والتي شهدت مشادة كلامية بين الشحات وأحد لاعبي الزمالك عقب تسجيل هدف الأهلي.
وقال شيكابالا خلال استضافته في برنامج «ضيفي مع معتز» المذاع عبر قناة الشرق للأخبار، إن ما فعله حسين الشحات بعد الهدف «كان ملوش لازمة»، موضحًا: «ماتش الأهلي والزمالك الأخير حسين الشحات مع اللاعب بتاعنا خوان ، فبعد ما جاب الجون بيشاور له وبيقوله إنت قصير، فملهاش لازمة خالص».
وأضاف شيكابالا قائلًا: «الفرق بينهم 6 سنتي بس، يعني مفيش حاجة، وبعدين إنت جبت جون وكسبان، ليه تدخل في حتة شكل اللاعب أو طوله؟ دي مش روح رياضية».
«الكرة مش خناق.. دي متعة»
تحدث شيكابالا خلال اللقاء عن ضرورة عودة الروح الرياضية للملاعب المصرية، مشددًا على أن كرة القدم ليست ساحة حرب، بل وسيلة للفرحة والتشجيع الراقي، وقال:«الناس بتاخد الكورة في حتة تانية خالص، وده غلط الكرة المفروض تبقى متعة، سواء كسبت أو خسرت لازم تحترم المنافس».
وأشار إلى أن ما يحدث من مناوشات بين اللاعبين ينعكس بشكل سلبي على الجماهير، قائلًا: «العيال الصغيرة بتتفرج علينا وبتتعلم، لما يشوفوا لاعب كبير بيقلل من التاني ممكن يقلدوه، فلازم نكون قدوة».
لازم نرجع روح المنافسة الجميلة
أكد شيكابالا أن ما يميز مباريات القمة بين الأهلي والزمالك هو المنافسة الشريفة، لا المشادات أو الإهانات، مشيرًا إلى أنه رغم حدة اللقاءات بين القطبين، فإن الاحترام المتبادل هو ما يصنع تاريخ اللعبة.
وقال:«احنا زمان كنا بنلعب ونكسب أو نخسر عادي، بعد الماتش بنهزر مع بعض، دلوقتي الدنيا بقت كلها عصبية وزعل على الفاضي».
وطالب بضرورة أن يكون هناك وعي أكبر من اللاعبين والإعلام على حد سواء، لتجنب تصدير صورة سلبية عن الكرة المصرية، مؤكدًا أن الجماهير تحتاج إلى نموذج راقٍ يعكس روح الرياضة الحقيقية.
واختتم شيكابالا تصريحاته برسالة واضحة للاعبين الشباب: «الشهرة مش إنك ترد على المنافس أو تعمل لقطة، الشهرة الحقيقية إن الناس تفتكرك باللعب والأداء والأخلاق، دي اللي بتعيش».