بسنت شوقي: عيني الجريئة سبب اختياري للأدوار الشريرة
كشفت الفنانة بسنت شوقي عن تفاصيل وكواليس مشاركتها في مسلسل "وتقابل حبيب"، الذي عُرض ضمن الموسم الرمضاني لعام 2025، مؤكدة أن تجسيد شخصية "فرح" كان تحديًا نفسيًا كبيرًا بالنسبة لها، لما تحمله الشخصية من تعقيدات عاطفية وسلوكية قد لا يفهمها المشاهد من الوهلة الأولى.
فرح مش أنانية.. لكن محتاجة تعيش
يقدم لكم موقع “وشوشة” أبرز تصريحات الفنانة بسنت شوقي، خلال لقائها مع الإعلامية مفيدة شيحة في برنامج "الستات"، المُذاع عبر قناة “النهار”، ضمن تغطية القناة لفعاليات الدورة الثامنة من مهرجان الجونة السينمائي، أوضحت بسنت أن شخصية "فرح" أرهقتها نفسيًا، وقالت: “فرح تعبتني جدًا، لأنها مكتوبة بطريقة إن الناس مش هتفهم بسهولة ليه بتتصرف كده مع أختها، لكن أنا مش أنانية، أنا كمان من حقي أعيش وأحب وأتحب”.
وأضافت: “لما وصلت للحظة الحسم، واكتشفت إن لازم أختار، اتزنقت بين مشاعري وموقف أختي، وكانت لحظة صعبة”.
بسنت: “ليه دايمًا بتحطوني في أدوار الست المفترية؟”
أعربت بسنت عن دهشتها من تصنيفها في أدوار معينة، قائلة: "مش عارفة ليه دايمًا في أدواري بيقرروا يخلوني في الحتة دي، أكتر من 90% من الأدوار اللي بتجيلي فيها نزعة شر أو قوة زيادة، وناس قالتلي ده عشان ملامحي حادة وعيني جريئة"، ثم تابعت: "بس أنا غلبانة جدًا في الحقيقة".
أدوار الشر ممتعة لكن الناس بتحكم
رغم صعوبة الأدوار المركبة، أشارت بسنت إلى أنها تجد فيها متعة خاصة مضيفة: "أدوار الست القوية أو المفترية دايمًا ألذ من الأدوار العادية، لكن عشان إحنا شعب عاطفي، بنربط بين الدور والممثل نفسه، فلو عملت شريرة الناس بتفتكرني شريرة".
رسالة بسنت للممثلين: متحكمش على الدور.. افهمه
وجهت بسنت رسالة لزملائها الفنانين، قائلة: “مينفعش كممثل تحكم على شخصية تقول دي شريرة أو طيبة، مفيش حد شرير بيشوف نفسه شرير، ولا طيب بيشوف نفسه كامل، لازم نشوف الشخصية من وجهة نظرها هي، ونعرف ليه بتتصرف كده”.
بسنت شوقي: “الأدوار مش بالتصنيف.. بس بالحقيقة اللي وراها”
اختتمت بسنت شوقي حديثها بالتأكيد على أن الممثل الحقيقي لا يصنف الشخصيات بل يفهم دوافعها، موضحة أن التحدي يكمن في تقديم شخصية حقيقية، بغض النظر عن موقعها من الخير أو الشر، مشيرة إلى أن الفن لا يُختزل في الأبيض والأسود فقط.