محمود حجازي: "فريد" في "أيام 3" شخص فقد بوصلته
كشف الفنان محمود حجازي عن تفاصيل مشاركته في مسلسل “أيام 3”، متحدثًا عن ملامح شخصية “فريد” التي يجسدها في العمل، موضحًا أنها من أكثر الأدوار المركبة التي قدمها في مسيرته الفنية حتى الآن، لما تحمله من تناقضات وصراعات داخلية بين الخير والشر وبين الرغبة في الحب والنجاح والسقوط في طريق الانحراف.
وقال محمود حجازي في تصريح لـ"وشوشة": "اللي جذبني لشخصية فريد أولًا هو إنه شخص بيتفهم غلط، وده دور مختلف تمامًا عن أي عمل قدمته قبل كده فريد شخصية من بيئة شعبية، لكنه في نفس الوقت بيحلم بالحب والنجاح، وعايز يعيش حياة أفضل، بس بيستخدم كل ده بشكل غلط هو شخص فقد بوصلته، بقى بياخد حقه من الدنيا بطريقة غير منظمة، عشوائي في أفكاره وردود أفعاله".
فريد بين الحب والضياع.. شخصية مليانة تناقضات
وأضاف محمود حجازي: "فريد بيعبر عن الحب بطريقة غلط، ممكن يتحرش أو يغلط، وبيحاول يشتغل بعقله علشان ينجح، بس بيختار الطرق المشبوهة ورغم كده الشخصية بتصعب عليك جدًا لأنه مفتقد وجود الأب والأم، فقد أمه وهو صغير وأبوه غايب فكبر في الشارع ومشوش والحاجات دي خلتني عايز أقدم التركيبة دي بالشكل اللي يخلي الجمهور يحبه ويكرهه في نفس الوقت، هو بيضحكك ويصعب عليك وتتعصب منه، وده المزيج اللي شدني".
وأشار الفنان محمود حجازي إلى أن المخرج محمد أسامة كان له دور كبير في نجاح الشخصية، قائلا: "ده أول تعاون رسمي بيني وبين محمد أسامة، لكن اشتغلنا قبل كده في تجارب تانية، وكنت مهتم جدًا أشتغل معاه تاني لأنه مخرج عنده رؤية مميزة، الشركة المنتجة كانت محترفة جدًا، وفريق العمل كله كان متعاون وجميل، وده انعكس على الشاشة".
وعن ردود أفعال الجمهور، أوضح محمود حجازي أنها كانت مفاجأة له: "الناس تفاعلت جدًا مع الشخصية، والكومنتات كانت كلها حلوة في ناس قالتلي مستنيين فريد هيعمل إيه بعد اللي عمله في باباه والعيلة، لأنهم بيمثلوا العيلة الهمجية اللي كل حلقة بتعمل كوارث وبتخلي الناس مشدودة".
أما عن أصعب مشهد في العمل، فقال محمود حجازي: “أكتر مشهد كان متعب هو مشهد موت فريد في اللحظة دي حسيت بضعف الشخصية، أول حاجة نده عليها كانت أبوه وأخته وده رغم إنهم أول ناس كان بيحاربهم، حسيت إن الجملة دي طالعة من القلب، وده مكنش مكتوب في السيناريو، أنا اللي حسيته وقت التصوير لما قولت، يا أبا، يا رحاب، بعد المشهد دا، كنت منهار، لأنه لمسني جدًا".
واختتم حديثه متحدثًا عن كواليس التصوير قائلًا: “الكواليس كانت لذيذة جدًا، خصوصًا مع الفنان الكبير رياض الخولي، وشيرين عادل، وسلوى خطاب، وأحمد صفوت، كلهم كانوا محترفين ومحبين للشغل، وده باين على الشاشة يمكن ده أحد أهم أسباب نجاح المسلسل".