هند مدحت تعلن ارتداء الحجاب: عيد ميلاد جديد وحياة جديدة بدعوات أهلي

أعلنت الإعلامية هند مدحت ارتداءها الحجاب، في رسالة مؤثرة غلبت عليها المشاعر الصادقة والسلام الداخلي، مؤكدة أنها انتظرت هذه الخطوة لأكثر من أربع سنوات.

وكتبت عبر حسابها الرسمي على موقع التواصل الاجتماعي "إنستجرام": “عمري ما غبت في الكلام، ولا اتحطيت في موقف ولا كنت عارفة أقول إيه، بس أنا فعلا مش عارفة أكتب ولا أقول حاجة، مكنش عندي شك إن اللحظة دي هتيجي تاني”.
 

وأضافت: “كنت واثقة إن ربنا عارف اللي جوايا، وعارف أنا بحبه قد إيه، ومش بتبسط في أي مرة بعصيه فيها، سواء في الكبائر أو الصغائر، أنا بقالي أربع سنين مصدعة صحابي، أنا عايزة أتحجب، مش قادرة بس عايزة، بحب شعري، وبحب البحر والتان، وبحب الفساتين القصيرة، والحفلات والسهر والمزيكا”.

واستكملت: “بحب نظرات الإعجاب بجمالي في عين أي حد يشوفني، راجل أو ست، وبحب شغلي جدًا اللي يمكن الحجاب يغير شكله، أو يخليني مقدرش أعمله تاني، بس بحب ربنا أكتر، لكن مش قادرة أحول الحب لفعل، مش عارفة آخد الخطوة دي”.

واختتمت رسالتها قائلة: “النهاردة عيد ميلاد جديد ليا، ميلاد لحياة جديدة، ما بدأتش النهاردة، لكن بدأت من سنة وركزت فيها من 6 شهور، مش هعرف أكتب اللي جوايا، بس أنا اتحجبت بدعوات أمي وأبويا وإخواتي، ودعوات كل بنت هنا عندي، كانت كل ما تشوفني بطرحة أو في عمرة أو أي حاجة تدعيلي، وأنا عايزاكم تكملوا دعاء ليا بالثبات، ربنا بس اللي عارف القرار ده أخد مني قد إيه، بس أنا دلوقتي مرتاحة ومطمنة أكتر، وعارفة وواثقة إنه هيساعدني، ادعولي كتير بالثبات، وإن ربنا يقدرني ألبسه بالطريقة الصحيحة اللي ترضيه”.