طارق الشناوي: شيرين ثروة قومية.. ونخشى أن تكرر مصير ويتني هيوستن
أكد الناقد الفني طارق الشناوي أن المطربة شيرين عبد الوهاب تمثل قيمة فنية كبيرة وثروة قومية لمصر والعالم العربي، مشددًا على أن الجميع يتمنى أن تستعيد توازنها وتعود واقفة على قدميها من جديد.
وقال خلال مداخلة هاتفية عبر برنامج "الستات" المذاع عبر قناة “النهار”: "شيرين صوت نادر، وإحساسها لا يُعوض، وعشان كده لازم نساعدها تقف من تاني".
وأضاف الشناوي أن شخصية شيرين بطبيعتها متطرفة في قراراتها، وغالبًا ما تتسم ردود أفعالها بالاندفاع والعاطفة، مشيرًا إلى أنها هي من سمحت بدخول الإعلام والجمهور إلى تفاصيل حياتها الخاصة، وتابع: "هي اللي قالت إن حسام حبيب كان مصدر خطر عليها، والنهاردة جنبها عشان يحميها، وده بيؤكد التناقض اللي بتعيشه شيرين في لحظاتها الصعبة".
وأشار الشناوي إلى أن شيرين أصبحت تتعامل مع الناس من منطلق الشك والريبة، ولديها إحساس دائم إن اللي حواليها عايزين يستفيدوا منها، وقال: "هي تحولت لصفقة تجارية الكل عايز يستغلها، وده مؤلم جدًا، لأنها إنسانة قبل ما تكون فنانة، وعاشت ضغوط شهرة قاسية ومؤلمة".
وفي ختام مداخلته، عبّر الشناوي عن قلقه الشديد من أن يتكرر سيناريو المطربة الأمريكية الراحلة ويتني هيوستن مع شيرين، قائلا: "مش عايزين نشبهها بويتني هيوستن، عشان ما تكونش النهاية مؤسفة، في حاجات بتحصل حوالين شيرين بتخلينا نخاف عليها بجد، لأن اللي بيقرب منها مش دايمًا بيقرب بحُب، في ناس بتقرب لأسباب تانية".