عمر عبدالعزيز: اتورطت في الكوميديا.. وعلي بدرخان قاعد في البيت ليه؟
تحدث المخرج عمر عبدالعزيز عن مشواره الفني وتخصصه في إخراج الأفلام الكوميدية، موضحًا أنه لم يكن يخطط لهذا الاتجاه في البداية، لكنه تورط فيه بسبب النجاح.
وقال عبدالعزيز، خلال استضافته في برنامج "ساعة ونس" عبر قناة CBC سفرة: "أنا كنت متصور إني همشي في طريق كمال الشيخ، الرجل الجاد، وحتى مشروع تخرجي كان عن القاهرة ٧٦ وشارع الشواربي في افتتاحه... لكن كل ما أقدمه، يقولوا لي: ما تعمل لنا حاجة كوميدي!"
وأضاف: "لما عملت الكوميدي نجح... فكمّلت. وأنا بحب الكوميديا اللي فيها موضوع ومضمون".
وتطرق عبدالعزيز إلى أسباب غياب عدد من مخرجي جيله عن الساحة، قائلاً: "فين علي بدرخان؟ فين محمد عبدالعزيز؟ فين محمد جلال؟ حصل انقطاع لأسباب كتير، منها إن زمان كانت منافذ الإنتاج كتيرة، ودلوقتي مش عايزين شروطنا".
واستغرب من طبيعة الإنتاج الحالي، قائلاً: "يعني إيه أدخل أصور مسلسل ومعايا 3 حلقات بس؟! أو أشتغل في فيلم يوم ويقفوا أسبوع؟! ده مش منطق.. إحنا شروطنا بقت صعبة عليهم".
وعبّر عن أمله في عودة جيله من المخرجين، مضيفًا: "أنا متفائل إننا هنرجع تاني... أنا وهاني لاشين ومحمد أبو سيف والجيل ده كله، لأنه لا يصح إلا الصحيح".
وختم حديثه بتساؤل يحمل الكثير من العتاب: "علي بدرخان ده يقعد في البيت؟! إزاي؟! في أساتذة كتير ماتوا قهرًا".