أحمد الجندي: رحمة أحمد كانت رهان صعب.. وقررنا اختيارها في 10 دقائق بس

تحدّث المخرج أحمد الجندي عن تفاصيل مشاركة الفنانة رحمة أحمد في مسلسل "الكبير أوي" بطولة الفنان أحمد مكي.

وقال الجندي، خلال ظهوره في برنامج "إنرجي بلس" عبر إذاعة راديو إنرجي: "رحمة أحمد دي قصة غريبة جدًا، كنا بنحضّر لمسلسل الكبير، ودنيا سمير غانم ماكنتش هتقدر تكون موجودة، فقلنا إحنا محتاجين بطلة، وأي حد هيجي الجمهور هيقارنه بدنيا، ومفيش وجه مقارنة، واللي هتيجي هتتظلم. فكرنا لو جبنا حد معروف، هتتشاط فورًا، فقررنا نجيب وجه جديد تمامًا ونغامر، عملنا تجارب أداء لعدد كبير، وجالي تليفونات من زمايل إن في بنت بتعمل عرض، وطه دسوقي قالّي إن في بنت بتشتغل مع أحمد أمين وسكتشاتها حلوة، وأحمد مكي قالّي إن أحمد أمين رشحها وقال عليها كويسة جدًا".

وأضاف: "لقينا نفسنا بنتكلم عن رحمة بقالنا 3 أيام من غير ما نربط، رحنا شوفنا العرض، وقعدت معانا 10 دقايق بس، وبعدها قررنا إنها هي، وقلنا مبروك، لقيناها فاهمة نوع الهزار اللي بنشتغل بيه، لأن الكبير له طابع خاص، هزار في قمة العبث لكنه بيُقدم بجدية، وده خط فاصل في الكوميديا، البنات تحديدًا بيبقوا في موقف صعب، لأن الكوميديا عندهم يا تضحك يا لا، الدراما ممكن تتقبل حاجات، لكن الكوميديا لا، والموضوع كان صعب خصوصًا بعد خمس أجزاء وأكتر من 150 حلقة".

وتابع الجندي: "لقينا عندها ده فعلًا، وفاهمة إحنا بنهزر إزاي، فخدنا قرار مشاركتها في 10 دقايق، أنا وأحمد مكي اشتغلنا بإيدينا على أول ظهور ليها، وصورنا مشهد ليلة الدخلة في يوم كامل، وقلنا لو المشهد ده نجح، خلاص هي هتكمل".

كما علّق الجندي على الانتقادات التي تعرضت لها رحمة أحمد في الموسم السابع، قائلًا: "أول حلقة في الموسم الجديد رحمة اتبهدلت من التعليقات، الناس قالت صوتها عالي ومفيش جديد، بس أنا مش شايف إنها عملت حاجة أوحش من اللي فات، بالعكس، هي قدمت نفس اللي قدمته قبل كده".