“يابخته”.. منة القيعى تكشف لـ”وشوشة” سر الأغنية التي كتبتها لشقيقها بصوت الهضبة
كشفت الشاعرة منة القيعى تفاصيل غير متوقعة عن كواليس كتابة أغنية “يابخته”، التي غناها النجم الكبير عمرو دياب وحققت نجاحًا واسعًا، مؤكدة أن الأغنية لم تكن موجهة له في البداية، بل كانت نابعة من إحساس عائلي خاص.
وقالت منة القيعى في تصريح خاص لـ" وشوشة " : “فيه أغاني بكتبها وأنا عارفة مين اللي هيغنيها وفي أغاني بتيجي كده، وحي أو إحساس مفاجئ و(يابخته) كانت من النوع التاني كتبتها من حوالي ست سنين، وكانت أغنية قديمة جدًا عندي ومكنش في بالي مين ممكن يغنيها”.
وأضافت منة القيعى : “أنا كتبت الأغنية عن أخويا، لإنه شخص طيب جدًا، وكل كلمة فيها كانت طالعة من إحساسي تجاهه والناس افتكرت إني بقول (منة) قصدي على اسمي، لكن الحقيقة غير كده خالص”.
وتابعت منة القيعى: “فضل الكلام موجود عندي لحد ما عزيز الشافعي، صديقي وأخويا لحنها وبعد كده الهضبة سمعها وعجبته جدًا، وقرر يحطها في ألبومه وده حصل من سنة ونص وفرحت جدًا وقتها”.
وتحدثت منة القيعى عن لحظات استثنائية في مسيرتها الفنية هذا العام، قائلة: “السنة دي حققت حلمين، بنزل أغنية مع الكينج محمد منير، وكمان مع الهضبة عمرو دياب غير حبايبي اللي بتعاون معاهم دايمًا زي أحمد سعد، وعسيلي، وأصالة”.
واختتمت منة القيعى قائلة: “كل مرة بقابل عمرو دياب بيعبرلي قد إيه الأغنية عاجباه، وبيقولي: إنتي عاملة حالة غريبة في السوق وده بيسعدني جدًا نفسي أكون موجودة معاه أكتر، ويمكن المرة الجاية ننزل أغنيتين مش واحدة”.
يذكر أن أحدث ألبومات عمرو دياب كان بعنوان “مكانك”، وحقق نجاحًا كبيرًا منذ طرحه قبل عامين، حيث تصدر قوائم الاستماع في مصر والوطن العربي على جميع المنصات الموسيقية.