نور خالد النبوي: بدأت التمثيل بعمر 5 سنوات.. والسينما هي عشقي الأول

كشف الفنان الشاب نور خالد النبوي عن كواليس بداياته الفنية، ورؤيته لاختيار الأدوار، مؤكدًا أن تأثير الدور هو المعيار الأساسي بالنسبة له في قبول أي عمل، وليس عدد المشاهد أو حجم المساحة.

وقال نور خلال لقائه في برنامج "عيش صباحك" على إذاعة "نجوم إف إم": "أنا ببص على تأثير الدور مش عدد مشاهده.. ممكن مشهدين يسيبوا علامة، وممكن دور كبير يكون تأثيره أقل، المهم أنا بفكر فيه كويس قبل ما أقرر."

وأضاف: "أنا مش برفض حاجة لمجرد الرفض، لكن مش بحب أستعجل، ومش باعتبر نفسي عندي الخبرة الكافية اللي تخليني أجهز أي شخصية بسرعة، علشان كده التفكير هو الأهم بالنسبة لي."

وتحدث نور عن بدايته الفنية قائلاً: "دخلت المجال من سن 5 سنوات في فيلم "أفريكانو" مع المخرج عمرو عرفة، وشوفت وقتها مشهد الشلال اللي عمله الفنان أحمد السقا قدامي، وقلت ساعتها: أنا عايز أعمل كده"

ورغم عشقه المبكر للتمثيل، أوضح نور أنه مرّ بتجربة فشل دراسي في فرنسا حيث درس الاقتصاد لمدة عامين، لكنه بعدها قرر الاتجاه لدراسة التمثيل في كاليفورنيا، وقال: "من وقت ما بدأت الدراسة في أمريكا، وأنا قلت عايز أبقى على المسرح وأقدم مشاهد، وفعلاً بدأت أمشي في الطريق ده من سن 20."

وشدد على أهمية التطور الفني المستمر، مؤكدًا: "أنا بخاف من التوقف في نفس المكان، ودايمًا بحاول كل عمل يكون أقوى من اللي قبله."

وعن علاقته بالسينما والدراما، قال: "السينما بالنسبالي كل حاجة، لكن الدراما ليها متعة خاصة لأنها بتدخل بيوت الناس، ورمضان موسم أنا بعشقه لأن الكل بيتجمع فيه."

كما عبّر عن أمنيته في تقديم أعمال كارتونية بصوته: "بحب فكرة الدبلجة، وياريت أقدم عمل كارتون في يوم من الأيام." مشيرا إلى أن مثله الأعلى هو النجم العالمي الراحل مايكل جاكسون.

وفي ختام الحوار، أعرب نور عن سعادته باستقبال الجمهور له في بداياته الفنية، قائلاً: "أنا محظوظ إن الناس استقبلتني كويس، وأنا مش بشتغل غير علشان أنبسط ويكون الجمهور كمان مبسوط."