بدرية طلبة: أنا مع البوتوكس والفيلر بعد الخمسين
كشفت الفنانة بدرية طلبة عن جوانب مختلفة من حياتها الشخصية والفنية، وايضا التأثير السلبي للسوشيال ميديا، حيث قالت بدرية: "لما أدخل ألاقي كلام مشجع بفرح، لكن لما بلاقي عك بزعل جدًا، وده بيأثر على أختي اللي بمثابة والدتي، بتخاف وتتخض من السباب اللي بيجيلي، وياريت أتشتم عشان غلطت".
وأكدت خلال ظهورها في برنامج "أسرار النجوم" عبر إذاعة نجوم اف ام، أنها تتفاعل مع الجمهور باحترام، وترد عليهم دومًا حتى لو بمجرد "لايك"، لكنها بدأت تراجع نفسها في منح الاحترام لمن لا يقدّره.
روت بدرية قصة بدايتها مع شخصية "مديحة حاتم" الشهيرة، قائلة: "كنت بعمل مسرحية مع سمير غانم، ولما رائد لبيب شافني، قال لي عايزك في دور بكاميرا خفية، وفعلاً بدأت الشخصية من هناك. والناس عرفوني بعدها باسم الشخصية، وده كان نجاح كبير بالنسبة لي."
وعبرت عن حبها وتقديرها للفنان الراحل سمير غانم، قائلة: "كان مدرسة حقيقية، ووقف جنبي في المسرح، وكان بيديني إفيهات تعلي الضحك، وده مش بيحصل كتير. ربنا يرحمه ويستر بناته، الخير اللي عمله لسه بيبان."
وقد تحدثت بدرية عن زواجها قائلة: "زوجي هو أبو بناتي وجد أحفادي، عارف إزاي يمتص غضبي، ودايمًا صدره حنين، وده اللي بيخلي الأولاد يحبوه، لأن الأب لو قسى بيتنسي، بعكس الأم اللي بتفضل محفورة في القلب."
وأكدت طلبة أنها تدعم عمليات التحميل، موضحة: "أنا مع البوتكس والفيلر، وعديت الخمسين، ولازم أهتم بنفسي كفنانة. مفيش مشكلة إن الفنان يشتغل على مظهره طالما مش بيبالغ."
وعن تشبيهها بزينات صدقي، علّقت على تشبيهها بالفنانة زينات صدقي قائلة: "ده شرف كبير، ياريت أكون ربعها، وبفرح لما حد يقول لي ضحكتيني من أول ما شفتك، لأن الضحك بقى شحيح جدًا الأيام دي".