محمد أنور: كنت هسيب التمثيل واشتغلت في مصنع
تحدث الفنان محمد أنور عن كواليس مسلسل "ديبو" الذي عرض مؤخرًا وحقق نجاحًا كبيرًا، مؤكدًا أن العمل كان تجربة مختلفة وفريدة من نوعها.
وقال أنور خلال لقائه ببرنامج "كلاكيت" على إذاعة نجوم إف إم: عمري ما سعيت أكون بطل عمل، رغم إن دي أمنيتي طبعًا، لكن دايمًا بحب أختار أدوار حلوة وقوية، فكرة مسلسلات المنصات مميزة لأن الجمهور بيدفع فلوس مخصوص علشان يتفرج عليك، وعلشان كده ببحث عن ورق مسلسل يشدني بجد".
وأوضح: "كان هدفنا نعمل مسلسل فيه تشويق وكوميديا في نفس الوقت، وفعلاً كلنا كفريق عمل مفتقدين ديبو وبنخطط لجزء تاني منه. فكرة فندق الحيوانات فكرة جديدة وما اتقدمتش قبل كده، وكل الحيوانات اللي ظهرت في المسلسل من أسد ونمر كانت حقيقية… القطة بس هي اللي كانت جرافيك".
كما عبر عن سعادته بالإقبال الجماهيري وضيوف الشرف الذين شاركوا في العمل، مشيرًا إلى أن الترويج للمسلسل ككوميدي ساعد على جذب جمهور كبير، ثم تم إدخال عنصر التشويق بطريقة محببة.
وتحدث أنور عن بداياته الصعبة في التمثيل، قائلاً: "فضلت 10 سنين بمثل في قصور ثقافة ومسرحيات صغيرة، وكلها كانت مجهودات شخصية. قدمت في معهد التمثيل وورشة الأستاذ خالد جلال وفشلت في الاثنين، لدرجة إني يئست واشتغلت في مصنع ملابس، وقررت أسيب التمثيل خالص".
واستكمل قائلاً: "لكن صدفة غيرت حياتي، لما زميل ليا من مسرح الجامعة كلمني علشان نحضر بروفة، ورجعت المسرح تاني، بعدها جاتلي فرصة عرض مسرحية شيزلونج اللي كانت هتتعرض 15 يوم بس، لكنها استمرت سنتين، ومنها عرفنا الأستاذ أشرف عبد الباقي، وبدأنا مشوارنا مع مسرح مصر".